![](https://onlinedabali.com/wp-content/uploads/2020/07/ktm-e1595988833513.jpg)
काठमाडौं । अब काठमाडौंमा धुम्रपान, सुर्ती-गुट्खा सेवन गर्न नपाइने भएको छ । काठमाडौं महानगरपालिकाले एक सूचना जारी गरेर असोज १ गतेदेखि धुम्रपान निषेध गरेको छ ।
महानगरपालिकाले विहीबार जारी गरेको सूचना अनुसार असोज १ गतेदेखि सार्वजनिक स्थलमा चुरोड, बिडी, सिगार,तमाखु, सुल्झा, कक्कड, कच्चा सुर्ती, खैनी खुट्खा वा त्यस्तै प्रकारका अन्य पदार्थ सेवन गर्न नपाइने भएको हो । सार्वजनिक स्थललाई धुम्रपान र सुर्तीजन्य पदार्थमुक्त क्षेत्र घोषणा गर्ने प्रयासलाई सहयोग गरिदिन पनि महानगरपालिकाले सबैसँग आग्रह समेत गरेको छ ।
काठमाडौं महानगरपालिकाले कानुन, सदाचार र सार्वजनिक हित तथा भलाइका हिसाबले धुम्रपान तथा सुर्तीजन्य पदार्थमुक्त क्षेत्र बनाउने बताएको छ । साथै सूचना अटेरी गर्नेलाई कारबाही र जरिबाना तिराइने समेत सूचनामा उल्लेख छ । सूचना अटेर गर्नेलाई सार्वजनिक स्थलबाट बाहिर निकाल्ने वा तोकिएको जरिवाना हुने उल्लेख छ ।
“प्रचलित कानुन, सदाचार र सार्वजनिक हित तथा भलाईको दृष्टिले सार्वजनिक स्थललाई धुम्रपान तथा सूर्तीजन्य पदार्थको सेवन नगर्ने स्थल बनाउन काडमाडौँ महानगरपालिकाबाट सूचना जारी गरिएकाले यो सूचनाको उलंघन गरेमा सूर्तीजन्य पदार्थको नियन्त्रण र नियमन गर्ने एन २०६८ समेतका आधारमा कानुन उलंघन गर्ने व्यक्तिलाई सार्वजनिक स्थलबाट बाहिर निकाल्ने वा तोकिएबमोजिमको जरिवाना समेत हुने ब्यहोरा सूचित गरिन्छ । सर्वसाधारण जनताको स्वास्थ्य, सुविधा र आर्थिक हितको अभिवृद्धि गर्ने उद्देश्यले काठमाडौँ महानरपालिका महानगरबासीमा विशेष आह्वान गर्दछ” सूचनामा भनिएको छ ।
मापदण्ड बिपरित र सार्वजनिक जग्गा मिलेर बनाइएका संरचना भत्काएर चर्चा पाएका मेयर बालेन शाहको यो निर्णयले पनि चर्चा पाउने बताइउको छ । गुट्खा तथा सुर्ती सेवनले सार्वजनिक स्थल फोहोर हुँदै गएको गुनासो आइरहेको बेला महानगरले यो निर्णय गरेको हो ।