अनलाइन डबली
काठमाडौँ । बेलारुसले सैन्य अभ्यास सुरु गरेको छ । बेलारुसले राजधानीसहित तीन स्थानमा सैन्य अभ्यास सुरु गरेको हो । बेलारुसको रक्षा मन्त्रालयका अनुसार सेप्टेम्बर १४ सम्म सैन्य अभ्यास जारी रहनेछ । सैन्य अभ्यास पोल्याण्ड र युक्रेनको सीमा क्षेत्रमा पनि गरिने भएको छ । युक्रेनमा सैन्य कारवाही गर्नुअघि रुसी सेनाले सीमा क्षेत्रमा गरेको सैन्य अभ्यासकै शैलीमा युद्धअभ्यास गरिएको बताइएको छ । युद्ध अभ्यासमा विरोधी सेनाले कब्जा गरेको भूमी कसरी फिर्ता ल्याउने भन्नेमा अभ्यास गरिएको छ ।
रक्षा मन्त्रालयले भिडियो जारी गर्दै युद्ध अभ्यासमा ७ हजार ५ सय सैनिक सहभागी रहेका छन् भने २६० बख्तरबन्द गाडी, ३० हवाई जहाज र हेलिकोप्टर सहभागी रहेको बताइएको छ । युद्ध अभ्यास राजधानी मिन्स्क, उत्तर पूर्व भीतेब्स्क र ब्रेस्त शहरमा जारी रहेको छ ।
युक्रेन सीमाबाट ३२ किलोमिटर र पोल्याण्डबाट मात्रै १० किलोमिटरमा अभ्यास नेटो सदस्य रहेका लातविय, लिथुआनियालाई पनि युद्ध अभ्यासले चुनौती थपेको अन्तर्राष्ट्रिय संचारमाध्यमहरुले बताएका छन् ।
बेलारुसले आफ्नो सीमा नजिक नेटोले गरेको गतिविधिका कारण युद्ध अभ्यास गर्नु परेको बताएको छ । यसको मुख्यकारक पश्चिमा देशहरु भएको बेलारुसले पनि बताएको छ । रुसले सैन्य कारवाही अघि सीमा क्षेत्रमा गरिएको शैलीमा युद्ध अभ्यास सुरु गरेसँगै बेलारुस पनि युद्धमा सहभागी हुने विश्लेषण हुन थालेको छ । बेलारुसले युक्रेन वा पोल्याण्डमा यसअघि पनि सैन्य कारवाही गर्न सक्ने अनुमान गरिएको थियो ।
युक्रेनमाथि रुसको सैन्य कारवाहीको सुरुदेखि समर्थन गर्दै आएको बेलारुस प्रत्यक्ष रुपमा भने युद्धमा सहभागी भएको छैन । उसले रुसी सेनालाई आफ्नो आकाश र जमिन प्रयोग गर्न अनुमति दिइसकेको छ । तर, सैन्य सहभागीता भने जनाइसकेको छैन । बेलारुसको अहिलेको अभ्यासले युद्धमै सहभागी हुने स्तरको रहेको बताइएको छ ।
नेटोले बेलारुसको सीमा नजिकै युद्ध अभ्यास गरेसँगै राष्ट्रपति अलेक्जेण्डर लुकाशेन्कोले परमाणु तैनाथको आदेश दिएका थिए । उनले .रुससँग परमाणु अस्त्र ल्याइसकेको बताएका छन् । उनले फाइटर विमान पनि अपग्रेड गरिसकेको भन्दै नेटोको विमानहरु ध्वस्त गर्न चेतावनी दिएका थिए । अपग्रेड गरिएका फाइटर विमानले परमाणु हतियारबाट मार हान्न सक्ने बेलारुसको रक्षा मन्त्रालयले जनाएको छ ।
