अनलाइन डबली
काठमाडौँ । केही अमेरिकी राजनीतिज्ञको ताइवान भ्रमणका बीच चीनले फेरि एकपटक सैन्य अभ्यास तिब्र गतिमा सुरु गरेको छ ।
चीनले ताइवान नजिकै यो दर्जनौ मिसाइल प्रहार गरेको हो । मिसाइल प्रहार गरे पनि यो शैन्य अभ्यास मात्रै भएको चीनले बताउदै आएको छ ।
केही दिन अघि मात्रै चीनले ताइवान वरपर चलिरहेको सैन्य अभ्यास रोकेको थियो । त्यसबेला अमेरिकाको प्रतिनिधिसभाकी सभामुख न्यान्सी पेलोसीको ताइवान भ्रमणपछि चीनले यो अभ्यास सुरु गरेको थियो ।
अब चार अमेरिकी सांसद ताइवान पुगेका छन् । यी अमेरिकी राजनीतिज्ञहरू आइतबार कुनै घोषणा बिना ताइवान पुगेका छन् । भ्रमणका क्रममा उनले ताइवानका राष्ट्रपति ताइ इङ वेनसँग भेट गर्ने अपेक्षा गरिएको छ ।
चीनले आफ्नो एक चीन नीति अन्तर्गत ताइवानलाई आफ्नो हिस्सा मान्छ । चीनले कुनै पनि विदेशी प्रतिनिधिमण्डलको ताइवान भ्रमणको विरोध गरेको छ ।
चीनले आफ्नो यो नीतिका लागि न्यान्सी पेलोसीको यात्रामा पनि आपत्ति जताएको थियो । तर पेलोसीले चीनको आपत्तिलाई बेवास्ता गर्दै ताइवानको यात्रा गरिन् ।
अमेरिकाले एक चीन नीतिलाई समर्थन गरे पनि पेलोसीको भ्रमणमा बाइडेन सरकारले वक्तालाई कतै जानबाट रोक्न नसक्ने बताएको छ ।
चिनियाँ विदेश मन्त्रालयका प्रवक्ता वाङ वेनबिनले अमेरिकी सांसदको पछिल्लो भ्रमणबारे चीनले आफ्नो सार्वभौमसत्ता र अखण्डताको रक्षा गर्न कडा कदम चाल्ने बताए ।
