अनलाइन डबली
काठमाडौँ । पश्चिमा देशहरुको भरमा रुससँग युद्ध लडिरहेको युक्रेन चरम आर्थिक संकटमा फसेको छ । युक्रेनसँग सेनालाई तलब दिने समेत पैसा छैन । युद्धमैदानमा रासन पानी समेत पठाउन नसक्ने अवस्थामा युक्रेन पुगेको अन्तर्राष्ट्रिय संचारमाध्यमहरुले बताएका छन् । रुसले सैन्य कारवाही सुरुगरेयता युक्रेनले आफ्नो बजेटको ६० प्रतिशत लडाईमा खर्च गरिसकेको छ । भारतीय टिभि च्यानल न्यूज १८ मा प्रसारित एक रिपोर्टअनुसार ४० प्रतिशत बजेट अन्य सेवामा खर्च भयो र अब केही पैसामात्रै ढुकुटीमा रहेको छ । बजेटमा पक्षेपण गरेको भन्दा ४० प्रतिशत मात्रै कर उठेको छ ।
अमेरिका तथा नेटो देशहरुले युक्रेनलाई पैसा होइन हतियार मात्रै दिइरहेका छन् । राष्ट्रपति भोलोदिमिर जेलेन्स्कीले आफ्नो देशको ढुकुटी सकिन लागेको भन्दै केही पहिना पहिले नै पैसा मागेका थिए । तर, अहिलेसम्म कुनै पनि देशले आर्थिक सहयोग गरेका छैनन् ।
चरम आर्थिक संकटसँगै युक्रेनले सेनालाई नै तलब दिन सकेको छैन । त्यस्तै, पैसाको लागि अन्य देशबाट आएर लडिरहेकाहरुलाई पनि युक्रेनले तलब दिन नसकेपछि उनीहरु फर्किन थालेको बताइएको छ । देशकै अन्य पेशा छोडेर लडाइँमा गएका नागरिकलाई पनि रासन पानी उपलब्ध गराउन सकेको छैन । तलब र रासन पानी नभएर भोकभोकै लड्नु पर्ने अवस्था आएपछि युद्धमोर्चाबाट दिनदिनै भाग्नेको संख्या बढिरहेको रुसी संचारमाध्यमहरुको दाबी छ ।
युक्रेनलाई आर्थिक संकट परिरहेको बेला स्लोभाकियाले मिग– २९ जेट बिमान दिने घोषणा गरेको छ । यो जेट बिमान लडाइँको लागि निकै प्रभावकारी मानिन्छ । स्लोभाकियाले आफ्नो देशसँग भएका सबै मिग जेट बिमान युक्रेनलाई प्रयोग गर्न दिने समेत बताएको छ ।
तर, भारतीय रक्षा विज्ञ विनोद आगस्टीन युक्रेनलाई पश्चिमा देशहरुले प्रयोगशाल बनाएका छन् । उनले आफ्ना नयाँ हतियार युक्रेनमा परीक्षण गरिरहेको बताए । “युक्रेनलाई आर्थिक संकट छ, युद्धमैदानमा रहेका सेनालाई तलब खुवाउने पैसा छैन तर पश्चिमा देशहरुले आफूले विकास गरेका हतियार युक्रेनलाई दिइरहेका छन् । उनीहरुले आफ्ना हतियार परीक्षण गरिरहेका छन्” उनले भने ।
यसैबीच रुसले युक्रेनमा नयाँ हतियारबाट हमला गरेको छ । केही दिनदेखि खेरसनमा रुसी सैनिकमाथि अमेरिकाले दिएको हिमार्सलगायतका हतियारबाट युक्रेनले गरिरहेको थियो । केही दिन पहिले पनि रुसले खेरसनमा दुईवटा हिमार्स मिलाइस सिस्टम ध्वस्त पारेको थियो । त्योसँगै रुसले ५३ जना विदेशी सैनिकको मृत्यु भएको समेत जनाएको थियो ।
