अनलाइन डबली
काठमाडौँ । पाकिस्तानको सर्वोच्च अदालतले मङ्गलबार राती चौधरी परवेज इलाहीलाई पञ्जाबको आधिकारिक मुख्यमन्त्री घोषणा गर्यो ।
पाकिस्तानको सबैभन्दा धेरै जनसंख्या भएको पञ्जाब राज्यमा जुलाई २२ मा भएको मुख्यमन्त्रीको चुनावमा इलाहीले १८६ मत पाएका थिए भने उनका प्रतिद्वन्द्वी पीएमएल–एनका हम्जा शेहबाजको १७९ मत आएको थियो ।
तर पञ्जाब विधानसभामा उपसभामुख दोस्त मोहम्मद मजारीले पाकिस्तान मुस्लिम लिग–(क्याए–दे–आजम)का १० सांसदले पार्टीको निर्णयलाई उल्लघंन गरेर इलाहीको पक्षमा हालेको मतलाई अमान्य घोषित गरिदिएका थिए ।
उपसभामुख मजारीले पाकिस्तानको संविधानको धारा ६३ क (१) (ख) अनुसार पार्टी निर्णय उल्लघंन गर्ने सांसदको मत मान्य नहुने तर्क दिएका थिए । सर्वोच्च अदालतले भने पञ्जाब विधानसभाका उपसभामुख मजारीको जुलाई २२ को निर्णयलाई अमान्य घोषणा गरिदिएको छ ।
‘हामीले पञ्जाब विधानसभाका उपसभामुखद्वारा संविधानको धारा ६३ क (१) (ख) को प्रावधानहरू गलत र त्रुटिपूर्ण रुपमा प्रयोग गरेको पायौं, यसलाई निरन्तरता दिन सकिँदैन,’ निर्णयमा भनिएको छ ।
यो फैसला पाकिस्तानका प्रधानन्यायाधीशको नेतृत्वमा बसेको न्यायाधीश इजाजुल अहसान र न्यायाधीश मुनिब अख्तरसम्मिलित इजलासले सुनाएको हो ।
अदालतको निर्णयपछि बुधबार बिहान देशका राष्ट्रपति डा. आरिफ अल्वीले इस्लामावादमा इलाहीलाई सपथ ग्रहण गराए । पञ्जाबका गभर्नर बालीगुर रहमानले सपथ ग्रह गराउन अस्वीकार गरेपछि इलाही लाहोरबाट संघीय राजधानी पुगेका थिए ।
फैसलामा पञ्जाबका गभर्नर बालीगुर रहमानलाई मंगलबार राति ११ः३० बजेसम्म कानून र संविधान अनुसार परवेज इलाहीलाई पदको सपथ गराउनसमेत आदेश दिएको थियो । र गभर्नर त्यसो गर्न असक्षम रहे वा अनिइच्छुक रहे राष्ट्रपति अल्वीले सपथ गराउन भनिएको थियो ।
सर्वोच्च अदालतको निर्णयको केन्द्रमा गठबन्धन सरकार चलाएका दलहरुले विरोध गरेका छन् । यो निर्णयपछि पञ्जाबका मुख्यमन्त्री रहेका हेम्जा शाहवाजको पद गुमेको छ । हेम्जा पाकिस्तानका प्रधानमन्त्री शेहबाज शरिफका छोरा हुन् ।
अदालतको निर्णयमा इमरान खान र उनको पार्टीले भने समर्थन गरेको छ । उनले पहिलेदेखि इलाहीलाई मुख्यमन्त्रीमा समर्थन गर्दै आएका छन् ।–डनबाट
