काठमाडौँ । भरतपुर महानगरपालिकाको मेयरमा नेकपा माओवादी केन्द्रकी उम्मेदवार रेणु दाहालले जित्ने निश्चित भएपछि नेकपा एमालेका प्रतिनिधिले बबाल मच्चाएका छन् ।
सोमबार दिउँसो वडा नम्बर २७ को मतपेटिका जाँचका लागि पुगेका एमालेका प्रतिनिधि फर्किने क्रममा एकाएक मतगणना स्थलमा प्रवेश गरेका थिए । प्रवेश निषेधित क्षेत्रमा एमाले कार्यकर्ता जबरजस्त प्रवेश गरेपछि प्रहरीले नियन्त्रणमा लिएको थियो ।
सुरक्षालाई ख्याल गर्दै तोकिएको अधिकारीबाहेक अरुलाई प्रवेश गर्न निषेध गरिएको थियो । तर, एमाले कार्यकर्ता अनाधिकृत रुपमा प्रवेश गरेपछि नियन्त्रणमा लिनु परेको प्रहरीले बताएको छ ।
त्यही विषयलाई लिएर एमाले नेताहरुले मतगणनामा अवरोध पुर्याएका छन् । उनीहरुले प्रहरीले नियन्त्रणमा लिएकाहरुलाई नछोडेसम्म मत गणना हुन नसक्ने बताएका छन् । एमाले नेताहरुको अडानका कारण अहिले मतगणना रोकिएको छ ।
मत गणना अन्तिम चरणमा पुगेको अवस्थामा एमाले कार्यकर्तालाई आफूले हार्ने निश्चित भएपछि उदण्डता मच्चाएको नेपाली काँग्रेस र माओवादीका नेताहरुले बताएका छन् । उनीहरुले तत्काल मत गणना सुरु गर्न माग गरेका छन् । रेणले एमालेका विजय सुवेदीलाई फराकिलो मतले पछि पारेकी छन् ।
भरतपुर महानगरपालिकामा ११२३७६ मतगणना सकिँदा रेनु दाहालले ४५२३९ मत प्राप्त गरेकी थिइन् । नेकपा एमालेका उम्मेदवार विजय सुवेदीले ३४६४२ मत प्राप्त गरेका छन् ।
यस्तै स्वतन्त्रबाट उम्मेदवारी दिएका जगन्नाथ पौडेलले १३७६१ मत प्राप्त गरेका छन् । त्यस्तै काँग्रेसबाट उप मेयरका उम्मेदवार चित्रसेन अधिकारीले ४६३०० मत प्राप्त गरेका छन् भने राप्रपाकी उम्मेदवार हिमला गुरुङले २७३५७ मत प्राप्त गरेकी छन् । फाइन तस्विर