अनलाइन डबलीचितवन । भरतपुर महानगरपालिकाको पछिल्लो मत परिणाम सार्वजनिक भएको छ । भरखर सार्वजनिक भएको ताजा मत परिणाम अनुसार रेणु दाहालले थप अग्रता बनाएकी छन् । रेणले नेकपा एमालेका विजय सुवेदीलाई ५ हजार १३३ मतले पछि पारेकी छन् । रेणुले २७ हजार ४१२ मत प्राप्त गरेकी छन् ।
त्यसैगरी रेणुलाई पछाइरहेका नेकपा एमालेका उम्मेदवार विजय सुवेदीले २२ हजार २७९ मत पाएका छन् । रेणुविरुद्ध बागी उम्मेदवारी दिएका काँग्रेस नेता जगन्नाथ पौडेलले ९ हजार ५५२ मत पाएका छन् । पौडेलले काँग्रेसको करिब १० हजार काट्दा पनि रेणुले निरन्तर अग्रता लिइरहेकी छन् ।
गठबन्धनको निर्णयविरुद्ध उभिएका काँग्रेस नेताहरुले नै पौडेललाई उम्मेदवार दिन लगाएको बताइएको थियो । काँग्रेस नेताले उपमेयरका उम्मेदवार चित्रसेन अधिकारीलाई दिने तर रेणुलाई नदिएर पौडेललाई भोट दिन प्रचार गरेका थिए । अधिकारीले शनिबार विहानसम्म २९ हजार ५२५ मत पाएका छन् । भने राप्रपाकी हिमला गुरुङले १७ हजार ३२५ मत पाएकी छन् ।
एमालेका सुवेदी र बागी पौडेलले रेणुको जितलाई रोक्न नसक्ने अनुमान स्थानीय नेता कार्यकर्ताहरुले गरेका छन् ।
यसैबीच शनिबार विहानसम्म कुल ७५३ स्थानीय तहमध्ये ६८४ स्थानीय तहको अन्तिम नतिजा घोषण भएको छ । शनिबार बिहानसम्म एक महानगरसहित उपमहानगर र नगरपालिकाको प्रमुख पदमा २३७ जनप्रतिनिधि विजयी भएका छन् भने गाउँपालिकाको अध्यक्ष ४४६ जनप्रतिनिधि विजयी भएका छन् । यी स्थानीय तहमा सबै वडाध्यक्षदेखि सदस्यसम्मका पदमा निर्वाचित भइसकेका छन् ।
यो विवरणअनुसार नेपाली काँग्रेस ३ सय पालिका जितेर पहिलो स्थानमा रहेको छ । काँग्रेसले स्थानीय तहको प्रमुख तथा अध्यक्ष गरी ३०३ स्थान जितेको छ । जसमा काँग्रेसले ११९ प्रमुख र १८४ गाउँपालिका अध्यक्ष जितेर ३ सतक कटाएको हो ।
पहिलोबाट दोस्रोमा झरेको नेकपा एमालेले १८५ प्रमुख तथा अध्यक्ष जितेको छ भने २०९ उपप्रमुख जितेको छ । त्यस्तै तेस्रो स्थानमा पुगेको नेकपा माओवादी केन्द्रले ११७ प्रमुख तथा अध्यक्ष र १२३ उपप्रमुख जित हात पारेको छ ।
त्यसैगरी जसपाले २२ प्रमुख तथा अध्यक्ष र १५ उपप्रमुख जितेर चौथो स्थानमा कायम गरेको छ भने नेकपा एकीकृत समाजवादीले १६ प्रमुख तथा अध्यक्ष र १९ उपप्रमुख जित हात पारेको छ ।
एक साताअघि देखि सुरु मतगणना अझै जारी रहेको छ । बाँकी स्थानीय तहको नतिजा पनि अधिकांश स्थानमा अन्तिम चरणमा पुगेको निर्वाचन आयोगले जनाएको छ ।
