काठमाडौँ । अब सरकारले हप्तामा दुई दिन बिदा दिने भएको छ । विहीबार बसेको मन्त्रिपरिषद् बैठकले सरकारी खर्च कटौती गर्न हप्तामा दुई दिन सार्वजनिक बिदा दिने निर्णय गरेको हो ।
सरकारी खर्च कटौती गर्न नेपाल राष्ट्र बैङ्कले हप्तामा दुई दिन सार्वजनिक बिदा दिन सरकारलाई सिफारिस गरेको थियो । राष्ट्र बैंकले सरकारी खर्च २० प्रतिशत कटौती गर्न सकिने भन्दै सिफारिस गरेको बताइएको छ । आर्थिक सङ्कट बढ्दै जान थालेपछि नेपाल राष्ट्र बैङ्कले हप्तामा दुई दिन बिदा दिएर कटौती गर्न सकिने बताएको हो ।
एक मन्त्रीका अनुसार सरकारी खर्चमा २० प्रतिशत कटौती गर्ने निर्णयसँगै सार्वजनिक बिदा दिने निर्णय गरेको हो। यो निर्णय कहिलेबाट लागु हुने भन्नेमा सरकारले केही खुलाएको छैन । यसबारे थप छलफलपछि निर्णय कार्यान्वयनमा आउने बताइएको छ ।
सरकारले दुई दिन बिदा दिँदा सेवा प्रवाहमा असर नपरोस् भनेर कार्यालय समय बढाउने समेत तयारी गरेको छ । यसबारे पनि थप छलफलपछि मात्रै निर्णय गरिने अधिकारीहरुले बताएका छन् । अहिले सरकारीले कार्यालयमा विहान १० देखि ५ बजेसम्म सेवा प्रवाह गर्दै आएको भने शुक्रबार १० देखि १ बजेसम्म र शनिबार सार्वजनिक बिदा दिएको छ ।
यसअघि पनि सरकारी खर्च घटाउन र सरकारी कार्यालयको सेवा प्रवाहमा सुधार गर्न सरकारी कार्यालयको समय बढाउने र त्यसबापत २ दिन बिदा दिन सुझाव आएको थियो । तर सरकारले कार्यान्वयन गरेको थिएन।
