काठमाडौं । रुस–युक्रेन युद्धको आज २२ औं दिन । रुसले युक्रेनी राजधानी किभस्थित सेनाको मुख्य सैन्य अखडामा हमला गरेको छ । सुरुदेखि नै युक्रेनलाई रुसविरुद्ध उचालिरहेको अमेरिकाले थप घातक हतियार दिने घोषणा गरेको छ । योसँगै युक्रेनका राष्ट्रपति भोलोदिमिर जेलेन्स्की खुशी भएका छन् । उनले रुसँग अब वार्ता नगर्ने बताएका छन् ।
यसैबीच आफूविरुद्ध लगाएको प्रतिबन्धको रुसले पनि जवाफ दिइरहेको छ । अमेरिकी राष्ट्रपनि जो बाइडनलगायतका अधिकारीमाथि प्रतिबन्ध लगाएको रुसले अमेरिका र युरोपेली देशका सयौं विमान कब्जामा लिएको छ ।
अन्तर्राष्ट्रिय संचारमध्यमहरुका अनुसार रुसले आफ्नो देशका वायु सेवा कम्पनीलाई भाडामा विमान दिएका अमेरिका र युरोपेली कम्पनीका सयौं व्यावसायिक विमान कब्जा गरेको हो ।
प्रतिबन्धका कारण रुसी एयरलाइन्स कम्पनीले भोगेका चुनौति सामना गर्ने उपाय खोज्ने क्रममा रुसले कानून नै बनाएर अमेरिका र युरोपका भाडामा विमान दिने कम्पनीका विमान कब्जा गरेको हो ।
रुसी राष्ट्रपति भ्लादिमिर पुटिनले सरकारको प्रतिबन्ध विरोधी उपाय सम्बन्धी कानूनमा हस्ताक्षर गरेका छन् । यो कानून अनुसार अब रूसी एयरलाइन्स कम्पनीले विदेशी कम्पनीबाट भाडामा लिएका विमान रूसमा दर्ता गर्न अनुमति दिएको छ । ती विमान रुसी एयरलाइन्सले आन्तरिक रुटमा उडाउन पाउने छन् ।
अमेरिका र युरोपका केही देशले रुसमाथि प्रतिबन्ध लगाएका छन् । जुन प्रतिबन्ध अनुसार रुसी वायु सेवा कम्पनीलाई भाडामा विमान दिने अमेरिकी र युरोपेली कम्पनीले एक महिना भित्रमा फिर्ता गर्नुपर्ने छ । तर रुसले बनाएको नयाँ कानून अनुसार अब विदेशी कम्पनीहरूलाई रूसी सरकारको स्वीकृति बिना आफ्ना विमान पुनः दाबी गर्न कठिन भएको छ ।
यसैबीच रुसी अधिकारीहरुले विमान लिन हिम्मत भएर आउन अमेरिका र युरोपेली देशहरुलाई चुनौति दिएका छन् ।
