काठमाडौं । आज बस्ने भनिएको प्रतिनिधिसभा बैठक सरेको छ । संसद सचिवालयले मंगलबार दिउँसो सम्भावित कार्यसूची सार्वजनिक गरिसकेको थियो ।
मंगलबार साँझ सभामुख अग्नि सापकोटाको निर्देशनमा संसद सचिवालयले सूचना टाँसेर संसद बैठक स्थगित गरेको हो । अर्को बैठक फागुन २ गते बस्ने सूचनामा उल्लेख छ ।
आजको संसद बैठकमा सरकारले विवादित अमेरिकी परियोजना मिलेनियम च्यालेन्ज कर्पोरेशन (एमसीसी) टेबुल गर्ने सरकारको तयारी थियो । तर सत्ता गठबन्धनको मुख्य दल नेकपा माओवादी केन्द्रले सहमति नजाएकै कारण संसद बैठक एक हप्ता पर सारिएको बताइएको छ ।
जबरजस्त एमसीसी टेबुल गरे आफू सरकारबाट बाहिरने माओवादी केन्द्रका अध्यक्ष प्रचण्डले प्रधानमन्त्री शेरबहादुर देउवालाई भनिसकेका थिए । आज बैठकमा टेबुल नगरे प्रश्न उठ्ने र गरे गठबन्धनमा संकट आउन सक्ने भएकोले सरकारकै आग्रहमा आजको बैठक सारेको बताइएको छ ।
माओवादी केन्द्रले यही २८ र २९ गते केन्द्रीय समिति बैठक बोलाएको छ । उसले एमसीसीबारे धारणा बनाउने बताइएको छ ।
