काठमाडौँ । आज तामाङ समुदायको महत्वपूर्ण पर्व सोनाम ल्होसार । सरकारले आज देशभर सार्वजनिक बिदा दिएको छ । नयाँ वर्षको रुपमा मनाइने सोनाम ल्होसार आज विभिन्न कार्यक्रम गरी मनाइँदैछ ।
कोरोना भाइरस संक्रमणका कारण विगतमा जस्तो धुमधाम र भिडभाडजन्य गतिविधि नगरी सिमित प्रक्रिया पूरा गरेर पर्व मनाउन सरकारले आग्रह गरेको छ ।
मञ्जुश्री पात्रोअनुसार आजदेखि २८५८ औँ वर्ष सुरु हुन्छ । आजदेखि गाई वर्ष पूरा गरी बाघ वर्ष प्रवेश हुन्छ । हरेक वर्ष माघ शुक्ल प्रतिपदाका अवसरमा विभिन्न कार्यक्रम गरी सोनाम ल्होसार मनाइन्छ । मुसा, गाई, बाघ, खरायो, मेघ, सर्प, घोडा, भेडा, बाँदर, चरा, कुकुर र सुँगुर गरी १२ वर्गमा सोनाम ल्होसारलाई विभाजन गरिएको छ ।
ल्होसारका १२ वटै वर्ष पशुपन्छीको नामबाट गणना गरिएकाले यसलाई प्रकृतिपूजक पनि भनिन्छ । आज बौद्धनाथ क्षेत्र विकास समितिले बौद्ध क्षेत्रमा विविध कार्यक्रम आयोजना गरी मनाउने गरिन्थ्यो । विगतमा बौद्ध क्षेत्रमा सोनाम ल्होसारका अवसरमा सांस्कृतिक झाँकीसहित बाजागाजाको र्याली निकालिने गरिएको थियो । तर, कोरोना महामारीका कारण यसपाली औपचारिक कार्यक्रम राखिएको छैन ।
यसैबीच, राष्ट्रपति, प्रधानमन्त्री लगायत राजनीतिक दलका शीर्ष नेताहरुले सोनाम ल्होसारका अवसरमा शुभकामना दिएका छन् । राष्ट्रपति विद्यादेवी भण्डारीले सोनाम ल्होसारजस्ता पर्वबाट सबै नेपालीबीच आपसी सद्भाव, सहिष्णुता र बन्धुत्वको भावना अभिवृद्धि हुने र यसबाट बृहत् राष्ट्रिय एकतालाई थप सुदृढ तुल्याउन मद्दत पुग्ने विश्वास व्यक्त गरेकी छन् ।
प्रधानमन्त्री शेरबहादुर देउवाले शुभकामना दिँदै कोभिड–१९ को जोखिम कायमै रहेकाले जनस्वास्थ्य मापदण्डको पालना गर्दै पर्व मनाउन आग्रह गरेका छन् । प्रधानमन्त्रीले पर्वले पारस्परिक सद्भाव र सहिष्णुको भावनालाई अझ प्रगाढ र सुदृढ बनाउन प्रेरणा प्रदान गरोस् भन्ने कामना समेत दिएका छन् ।
त्यसैगरी नेकपा माओवादी केन्द्रका अध्यक्ष प्रचण्डले पनि सोनाम ल्होसारको अवसरमा शुभकामना सन्देश दिएका छन् ।
