काठमाडौं । उत्तर कोरियाले एक हजार किलोमिटरसम्म मार हान्न सक्ने अहिलेसम्मकै नयाँ हाइपरसोनिक क्षेप्यास्त्र परीक्षण गरेको गरेको छ । सर्वोच्च नेता किम जोङ उनको रेखदेखमा हाइपरसोनिक क्षेप्यास्त्र प्रक्षेपण गरेको उत्तर कोरियाको समाचार संस्था केसीएनएले जनाएको छ ।
सन् २०२० को मार्च महिनायता क्षेप्यास्त्र प्रक्षेपण हुँदा नेता किम उपस्थिति भएको यो पहिलो पटक भएको बताइएको छ । दक्षिण कोरियाका अधिकारीहरुले मंगलबार उत्तरले क्षेप्यास्त्र परीक्षण गरेको बताएको थियो । तर, यसबारे उत्तर कोरियाले औपचारिक रुपमा जानकारी दिएको थिएन ।
नयाँ हाइपरसोनिक क्षेप्यास्त्र एक हजार किलोमिटर परको निसानामै पुगेको उत्तर कोरियाले जनाएको छ । नयाँ वर्षको अवसरमा नेता किमले प्योङयाङको प्रतिरक्षालाई बढाउने बताएका थिए ।
त्यसपछि दुईवटा क्षेप्यास्त्र परीक्षण भएका छन् । उत्तर कोरियाले यसअघि जनवरी ५ तारिखमा हाइपरसोनिक क्षेप्यास्त्र परीक्षण सफलतापूर्वक गरेको थियो । अमेरिका, बेलायत, जापान, फ्रान्सलगायत देशले त्यसको निन्दा गरेका थिए ।
हाइपरसोनिक अस्त्रको गति ध्वनिकोभन्दा पाँच गुणा बढी अर्थात् प्रतिघण्टा ६ हजार २०० किलोमिटर हुन सक्छ । हाइपरसोनिक क्षेप्यास्त्र विकास गर्नसक्ने थोरै देशमा उत्तर कोरिया पर्छ । अमेरिका र चीनले पनि यो क्षेप्यास्त्र विकास गरेका छन् । भारतले पटकपटक प्रयास गर्दा पनि अहिलेसम्म सफल परीक्षण गर्न सकेको छैन।
