काठमाडौं । प्रधानन्यायाधीश चोलेन्द्र शमशेर जबरालाई सर्वोच्च अदालत प्रवेश गर्न नदिने भन्दै कानून व्यवसायीहरुले गेटमा धर्ना दिएका छन् । तर प्रधानन्यायाधीश जबरा सर्वोच्च अदालतभित्र प्रवेश गरेका छन् ।
प्रधानन्यायाधीश जबरा १० बजेर ४४ मिनेटमा एक नम्बर गेट प्रयोग गरेर सर्वोच्च अदालतभित्र प्रवेश गरेका हुन् । यसअघि कानुन व्यवसायीहरुले एक नम्बर गेटमा पनि धर्ना बसेर जबरालाई प्रवेश गर्न नदिने बताएका थिए । तर, प्रहरीले एक नम्बर गेटमा धर्ना बस्न रोक लगाएपछि कानून व्यवसायीहरु मुल गेटमा धर्ना बसेका छन् ।
आज कुनै पनि हालतमा सर्वोच्च अदालत प्रवेश गर्न नदिने घोषणा गरेका कानुन व्यवसायीहरु जबरा आफ्नो कार्यकक्षमा पुगेपछि हेरेको हेर्यै भएका छन् ।
प्रधानन्यायाधीश जबराको राजीनामा माग्दै सर्वोच्च अदालतका बहुमत न्यायाधीश, सर्वोच्च बार र नेपाल बार एसोसिएसन तीन सातादेखि आन्दोलनमा उत्रिँदै आएका छन् । शुक्रबार पनि चोलेन्द्र चोरबाटो हुँदै सर्वोच्च छिरेका थिए ।
चोलेन्द्र सर्वोच्च प्रवेश गरिसकेपछि पनि वकिलहरुले पूर्वनिर्धारित कार्यक्रमअनुसार अदालतमा धर्ना दिने कार्यक्रम जारी राखेका छन् ।