काठमाडौँ । पूर्वप्रधानमन्त्री तथा जनता समाजवादी पार्टीका संघीय परिषद अध्यक्ष डा. बाबुराम भट्टराईले राष्ट्रपतिले घोषणा गरेको मध्यावधि चुनावलाई संघीय लोकतान्त्रिक गणतन्त्र र संविधान खारेज गर्ने प्रपञ्च भएको टिप्पणी गरेका छन् ।
राष्ट्रपति विद्यादेवी भण्डारीले शुक्रबार मध्यरातमा प्रतिनिधि सभा विघटन गरी निर्वाचनको मिति तोकेपछि शनिबार विहान भट्टराईले ट्वीटरमा यसको प्रतिवादमा उत्रिन आह्वान गरेका हुन् ।
अध्यक्ष भट्टराईले भित्री बाहिरी प्रतिगामी शक्तिहरूको षडयन्त्र र सेटिङमा फेरि प्रतिक्रान्तिकारी हर्कत शुरू भएको बताए । शुक्रबार रातिको संसद विघटन पनि पुस ५ गतेकै कडी भएको उनले बताएका छन् ।
भट्टारईले लेखेका छन्– भित्री÷बाहिरी प्रतिगामी शक्तिहरूको षडयन्त्र÷सेटिङगमा गत पुस ५ बाट जुन अलोकतान्त्रिक/ असंवैधानिक/प्रतिक्रा’न्तिकारी हर्कत शुरू भएको थियो त्यसैको कडी हो यो ओली–विद्या कुकर्म ! यो कुनै मध्यावधी चुनाव हैन संघीय लोकतान्त्रिक गणतन्त्र र संविधान खारेजगर्ने प्रपंच हो । एकजुट होऊ; प्रतिवाद गरौं !
यसैगरी नेपाली काँग्रेसका नेता शेखर कोइरालाले राष्ट्रपतिको कदमले देशलाई कहालिलाग्दो द्वन्द्वमा लगेको बताएका छन्। ुआफ्नो पदको गरिमा र मर्यादा कुल्चेर संविधानको संरक्षक राष्ट्रपतिबाट मध्यरातमा फेरि पनि संविधान च्यात्ने काम भएको कोइरालाले भनेका छन् ।
संसद विघटन गरी मध्यावधि घोषणा गर्ने राष्ट्रपतिको गैरसंवैधानिक र गैरराजनीतिक कदम भएको भन्दै कोइरालाले देशलाई कहालिलाग्दो द्वन्द्वमा लगेको बताए । उनले राष्ट्रपतिले संविधानलाई समाप्त गर्ने काम गरेको भन्दै क्षम्य हुनै नसक्ने बताए ।
काँग्रेसका अर्का नेता रमेश लेखकले राष्ट्रपतिले संविधान च्यात्ने काम गरेको प्रतिक्रिया दिएका छन्। प्रधानमन्त्रीमा परेका दाबी खारेज गरेलगत्तै लेखकले राष्ट्रपति भण्डारीबाट लोकतन्त्रको संरक्षण नहुने बताइसकेका थिए । “राष्ट्रपतिजीले फेरि आफ्नो पदको सम्मान, मर्यादा र गरिमा समाप्त गर्दै संविधान च्यात्ने काम गरिन। यिनीबाट गणतन्त्र र लोकतन्त्रको संरक्षण हुन सक्दैन” नेता लेखकले सामाजिक संजालमा लेखेका थिए ।
त्यसैगरी नेकपा (माओवादी केन्द्र)का नेता वर्षमान पुनले राष्ट्रपतिको कदमलाई मध्यरातमा डकैती गरेको संज्ञा दिएका छन्। संसद विघटन गरेर मध्यावधि चुनावको घोषणापछि पुनले सामाजिक संजालमा ज्ञानेन्द्र शाहले पनि शुक्रबार र मध्यरात नै रोज्ने गरेको लेखेका थिए । “‘मध्यरातमा डकैती गरियो। ज्ञानेन्द्र शाहले पनि शुक्रबार र मध्यरात नै रोज्ने गर्थे” पुनले लेखेका छन् ।
संविधानको धारा ७६(५) अनुसार केपी शर्मा ओली र शेरबाहादुर देउवाले गरेको दाबीलाई राष्ट्रपति विद्यादेवी भण्डारीले खारेज गरिदिएकी छन्।
राष्ट्रपतिको उक्त निर्णयसँगै प्रधानमन्त्री निवास बालुवाटारमा मन्त्रिपरिषदको आकस्मिक बैठक सरेर संसद विघटन गरी मध्यावधि निर्वाचनको सिफारिस गरेको थियो । सोहीअनुसार राष्ट्रपतिले संसद विघटन गरी कात्तिक २६ र मंसिर ३ गते मध्यावधि निर्वाचनको घोषणा गरेकी छन् ।
