काठमाडौं । सरकारले नेपाल कम्युनिस्ट पार्टीमाथिको प्रतिबन्ध फुकुवा गरेको छ । विहीबार बसेको मन्त्रिपरिषद् बैठकले नेकपामाथि दुई वर्ष पहिले लगाएको प्रतिबन्ध फुकुवा गर्ने निर्णय गरेको हो ।
मन्त्रिपरिषद् बैठकले सरकारी वार्ता टोली र नेकपाबीच भएको तीन बुँदे सहमति अनुमोदन समेत गरेको छ । नेकपाले शान्तिपूर्ण राजनीतिमा आउने प्रतिबद्धता जनाएकोले प्रतिबन्ध फिर्ता लिएको सरकारले जनाएको छ ।
यसैबीच भोलि (फागुन २१ गते) नेकपाका महासचिव विप्लवले करिब तीन बर्ष पछि पहिलो पटक सार्वजनिक रुपमा सम्बोधन गर्न भएका छन् । शुक्रबार दिउँसो २ बजे राष्ट्रिय सभागृहमा आयोजना गरिएको विशेष कार्यक्रममार्फत प्रधानमन्त्री केपी शर्मा ओली र विप्लवले सहमति सार्वजनिक गर्ने भएका छन् । एउटै कार्यक्रमबाट ओली र विप्लवले सहमति सार्वजनिक गर्दै विशेष सम्बोधन गर्ने सहमति भएको थियो ।
सरकारी वार्ता टोलीका सदस्य राजन भट्टराईका अनुसार राष्ट्रिय सभागृहमा विशेष समारोह आयोजना हुने छ । सोही समारोहबाट सहमतिको विस्तृत विवरण सार्वजनिक गरिने छ ।
बिहीबारको वार्तापछि सरकारी वार्ता टोलीका संयोजक एवम् गृहमन्त्री रामबहादुर थापा ‘बादल’ र नेकपाका वार्ता टोली संयोजक खड्कबहादुर विश्वकर्माले तीन बुँदे सहमति सार्वजनिक गरेका थिए ।
नेकपाले आफ्ना सम्पूर्ण राजनीतिक क्रियाकलापहरु शान्तिपूर्ण रुपमा सन्चालन गर्ने उल्लेख छ । साथै सरकारले प्रतिबन्ध हटाउने सहमति पनि भएको छ । नेकपामाथि सरकारले २८ फागुन २०७५ मा प्रतिबन्ध लगाएको थियो ।
सरकार र नेकपाबीच वार्ता सफल भएसँगै जेलमा रहेका नेता तथा कार्यकर्ता रिहा गर्न सरकारले देशभर सर्कुलर गरेको छ । मन्त्रिपरिषदको निर्णयपछि गृहमन्त्रालयले देशभरका हिरासतमा रहेका नेता कार्यकर्तालाई भोलिसम्म छोड्न प्रमुख जिल्ला अधिकारीलाई सर्कुलर गरेको हो ।
पार्टीका सचिवालय सदस्य हेमन्तप्रकाश ओली, धर्मेन्द्र बास्तोला, केन्द्रीय सदस्य माइला लामा, भरत बम, ओमप्रकाश पुन, चुडामणी ओलीसहित दर्जनौं नेता कार्यकर्ता जेल र हिरासतमा छन्
