काठमाडौं । कारोना महामारीसँगै बन्द भएको सवारी चालक अनुमतिपत्रका फारम खुला भएको छ । आजबाट यातायात कार्यालयले निश्चित कोटाका आधारमा अनलाइनबाट फारम लिने भएको छ ।
यातायात विभागका निर्देशक डा.लोकनाथ भुसालका अनुसार स्वास्थ्य सुरक्षाका सबै मापदण्ड पूरा गरेर आजदेखि सातै प्रदेशमा सवारीचालक अनुमतिपत्रका लागि अनलाइन फाराम खुला गरिएको हो । लकडाउन अगाडि लिखित परिक्षा दिएर पनि ट्रायल दिन नपाएका परीक्षार्थीको चाँडै ट्रायल परीक्षा लिने विभागले जनाएको छ ।
फारमको लागि कोटा लागु गरिएको छ । मोटरसाइकलमा दैनिक १ सय, स्कुटर र चारपाङग्रे सवारीमा ५०/५० गरी कुल २ सयले अनलाइन आवेदन दिन पाउने व्यवस्था गरिएको छ । यस्तै, लिखित परिक्षा पास गरेका परिक्षार्थीले अब १८ महिनासम्म ट्रायल दिन पाउने भएका छन् ।
यसको लागि विभागले आन्तरिक तयारी गरीरहेको र कानुनी जटिलता समाधान भएसँगै ट्रायल लिने विभागले जनाएको छ । उपत्यकामा चारसहित देशभर विभागका १७ कार्यालयबाट अनुमतिपत्र वितरण, नवीकरण गरिँदै आएको छ ।
लकडाउनका कारण लिखित परीक्षा पास भएर ट्रायल दिन नपाएका र पहिलोपल्ट ट्रायलमा फेल भएका परिक्षार्थीलाई लाभान्वित हुने गरि यो नियम जारी गर्ने तयारी भएको हो । कोरोना महामारीसँगै चैत्रबाट सवारी चालक अनुमतिपत्रका सबै कामहरु रोकिएका थिए ।
