काठमाडौँ । संसद विघटनविरुद्ध सर्वोच्च अदालतमा परेका रिटमाथि बहस सुरु भएको छ । सोमबार र मंगलबार दायर गरिएका रिटमाथि बहस सुरु भएको हो । प्रधानन्यायाधीश चोलेन्द्र शमशेर जबराको एकल इजलाशामा बहस शुरु भएको छ ।

(नेकपा) प्रचण्ड–नेपाल समूहका सांसद र कानुन व्यवसायीहरु गरी संसद विघटन ‘असंवैधानिक’ भएको दावी गर्दै सर्वोच्चमा १२ वटा रिट दर्ता भएका छन् । आज ११ वटा रिटमाथि सुनुवाई हुँदैछ ।

प्रधानमन्त्री केपी शर्मा ओलीले यही पुस ५ गते प्रतिनिधिसभा विघटन गरी आगामी वैशाख १७ र २७ गते मध्यावधि निर्वाचन गर्न सिफारिस गरेका थिए । राष्ट्रपति विद्यादेवी भण्डारीले सोही दिन उक्त सिफारिसलाई सदर गर्दै संसद् विघटन भएको घोषणा गरेकी थिइन् ।

नेपाली राजनीतिमा निर्णायक मोड दिने तथा कानूनी व्याख्यामा नयाँ दिशाबोध गर्ने यो मुद्दालाई राष्ट्रिय अन्तर्राष्ट्रिय रुपमा नै गम्भीर चासोका साथ हेरिएको छ ।