काठमाडौं । नेपाल कम्युनिस्ट पार्टी (नेकपा) अन्ततः विभाजन भएको छ । मंगलबार विहान बालुवाटार बसेको केन्द्रीय समिति बैठकबाट अध्यक्ष तथा प्रधानमन्त्री केपी शर्मा ओलीले ११९९ जनाको केन्द्रीय महाधिवेशन आयोजक कमिटी घोषणा गरेसँगै (नेकपा) औपचारिक रुपमा विभाजन भएको हो ।
आफू निकट केन्द्रीय सदस्यहरुको आज बसेको बैठकमा ओलीले पार्टीलाई भंग गर्दै महाधिवेशन आयोजक कमिटी घोषणा गरेका छन् । अहिले भएका ४४६ जना केन्द्रीय सदस्यमा ५५६ जना थप गर्ने र बाँकी १९७ खाली राखेर ओलीले महाधिवेशन आयोजक कमिटी बनाएका छन् ।
विहान ९ बजे बोलाइएको केन्द्रीय समिति बैठक केही समय ढिला गरि सुरु भएको थियो । बैठकमा ओलीले संक्षिप्त रुपमा परिस्थितिको जानकारी गराउँदै महाधिवेशन जाने भन्दै आयोजक कमिटी घोषणा गरेका थिए ।
ओलीले पछि आउनेलाई खाली राखेर आयोजक कमिटी बनाएका छन् । केही नेताहरुले दुबै पक्षमा नखुलिसकेको अवस्था भएको कारण १९७ खाली राखिएको हो ।
बैठकमा ओलीले आफूले कसैलाई पनि कारवाही नगर्ने र पार्टी पनि नफुटाउने बताएका थिए । उनले धेरैले अनुमान गरेभन्दा फरक अभिव्यक्ति दिए । प्रचण्ड र माधव कुमार नेपाललगायतका नेताहरुलाई ओलीले कारवाही गर्ने अनुमान गरिएको थियो ।
त्यसैगरी अहिले १ बजे अर्का अध्यक्ष प्रचण्ड र नेता माधव कुमार नेपाल समूहले बोलाएको केन्द्रीय समिति बैठक पनि सुरु हुँदैछ । बबरमहलस्थित कार्की पार्टी प्यालेसमा आयोजना गरिएको बैठकमा ओलीलाई कारवाहीकोप्रस्ताव पेश गरिनेछ । र केन्द्रीय समिति पुर्नगठन गर्ने तयारी भइरहेको बताइएको छ ।
