काठमाडौं । आजबाट अमेरिकामा कोरोना भाइरसविरुद्धको खोप लगाउन सुरु गरिने भएको छ । आम सर्वसाधारणले खोप लगाउन सक्ने गरी अमेरिकी सरकारले अनुमति दिएको छ । तर पहिलो चरणमा जोखिम क्षेत्रका व्यक्ति, स्वास्थ्यकर्मी, अग्रपंक्तिमा रहेर जोखिमयुक्त काम गर्नेहरु र ज्येष्ठ नागरिकले खोप पाउने अन्तर्राष्ट्रिय संचारमाध्यमहरुले जनाएका छन् ।
बीबीसीका अनुसार अमेरिकाका विभिन्न राज्यका १ सय ४५ ठाउँमा आज खोप लगाइनेछ । भोली अरु ४ सय २५ ठाउँमा खोप दिइनेछ । पहिलो चरणमा तीस लाख लाख मानिसहरुलाई खोप लगाइनेछ ।
अमेरिकाले फाइजर र बायोएनटेक कम्पनीले बनाएका खोपलाई आकस्मिक प्रयोगमा अनुमति दिएको छ । अमेरिकाको खाद्य तथा औषधि विभागले कोभिड–१९ विरुद्धको खोपलाई स्वीकृति दिएसँगै अमेरिकी नागरिकलाई खोप दिन सबै प्रक्रिया पूरा गरिएको छ । ती कम्पनीले बनाएका खोप ९५ प्रतिशत सुरक्षित मानिएको छ ।
फाइजरले पहिलो चरणमा डिसेम्बर अन्त्यसम्म अमेरिकाका लागि ६४ लाख डोज खोप तयार पार्नेछ । यो खोप दुई डोज लगाउनुपर्ने हुन्छ । पहिलो खोप लगाएको तेस्रो हप्ता अर्थात् २१ दिनका दिन दोस्रो खोप लगाउनुपर्ने हुन्छ । पहिलो चरणको खोपले ३३ करोड जनसंख्या भएको अमेरिकाका झण्डै ३० लाख नागरिकलाई पुग्नेछ ।
फाइजरको खोपलाई अमेरिकासहित, बेलायत, क्यानडा, साउदी अरेबिया र बहराइनले अनुमति दिइसकेका छन् । कोरोना भाइरसबाट सबैभन्दा धेरै प्रभावित अमेरिकामा अहिलेसम्म एक करोड ६७ लाख ११ हजार कोरोनाबाट सङ्क्रमित भएका छन् । सङ्क्रमितमध्ये तीन लाखभन्दा धेरैको ज्यान गएको छ भने ९७ लाख १३ हजार निको भएका छन् ।
यसअघि रुसले पनि कोरोना खोप सुरु गरिसकेको छ । त्यस्तै बेलायतलगायतका युरोपका देशहरुले पनि कोरोना खोप लगाउन सुरु गर्न अनुमति दिइसकेका छन् । तर नेपालसहित तेस्रो विश्वका देशहरुमा कोरोना खोप आइपुग्न अझै एक वर्ष लाग्ने बताइएको छ । खोप उत्पादन गर्ने देशहरुले पहिलो आफ्नो देशका नागरिकलाई लगाउने भएकोले नेपाल जस्ता साना देशहरुले तत्काल कोरोना खोप पाउने सम्भावना कमै भएको विज्ञहरुले बताएका छन् ।
