काठमाडौँ । अमेरिकाका लागि प्रस्तावित राजदूत युवराज खतिवडा र बेलायतका लागि प्रस्तावित राजदूत लोकदर्शन रेग्मीविरुद्ध संघीय संसदको सुनुवाई समितिमा उनिहरुलाई राजदुत नबनाउन माग गर्दै उजुरी परेको छ ।
अमेरिकाका लागि प्रस्तावित राजदूत खतिवडाका बिरुद्ध ३ ओटा उजुरी परेको छ भने बेलायतका लागि प्रस्तवित राजदूत लोकदर्शन रेग्मीविरुद्ध एउटा उजुरी परेको छ ।
यसअघि १० दिनको म्याद दिएर सार्वजनिक उजुरी आह्वान गरेपछि समितिमा दुईजनाविरुद्ध ४ उजुरी परेको समिति सभापति लक्ष्मणलाल कर्णले जानकारी दिए ।
सोमबार सुनुवाई समितिको बैठकले उजुरी खोलेको छ तर उजुरीकर्ताहरु सम्पर्कमा नआएका कारण सार्वजनिक नगरिएको समितिले जनाएको छ ।
उजुरीकर्तालाई सम्पर्कमा आउन आग्रह गर्दै सूचना निकालेर यहि कात्तिक १७ गते छलफलमा आउन आहृवान गर्ने निर्णय भएको समितिले जनाएको छ ।
अमेरिका, बेलायत र दक्षिण अफ्रिकाका लागि प्रस्तावित राजदूतविरुद्धका उजुरी संसदीय सुनुवाइ समितिले सोमबार खोलेको हो । खतिवडा र रेग्मी सगै दक्षिण अफ्रिकाका लागि प्रस्तावित राजदूत निर्मलकुमार विश्वकर्मा विरुद्ध भने उजुरी नपरेको बताइएको छ ।
प्रस्ताबित राजदुतलाई राष्ट्रपतिले राजदूतमा नियुक्ति गर्न संसदीय सुनुवाइ समितिबाट नाम अनुमोदन हुनु पर्ने ब्यवस्था रहेको छ ।
