काठमाडौं । सुरक्षितसँग जुम्ल्याहा बच्चा जन्माएकी कोरोना भाइरसबाट संक्रमित महिलाको निधन भएको छ । कञ्चनपुरको महेन्द्रनगरकी महिलाको बाँकेको कोहलपुरस्थित नेपालगञ्ज मेडिकल कलेजमा उपचारका क्रममा निधन भएको हो ।
कैलालीको धनगढीस्थित सेती अस्पतालमा विना अपरेसन जुम्ल्याहा बच्चा जन्माएकी कञ्चनपुरको महेन्द्रनगर–१ निवासी २९ वर्षीया महिलाको आइतबार बिहान साढे ४ बजे निधन भएको अस्पतालले जनाएको छ ।
बच्चा सुरक्षित जन्माएकी उनलाई उच्च रक्तश्राव भएको थियो । त्यसपछि उनको पाठेघरको अपरेसनका साथै ८ पोका होल रगत र ४ पोका प्लेटलेट रगत दिइएको थियो ।
कोरोनासँग मिल्दोजुल्दो लक्षण देखिन थालेपछि परीक्षण गर्दा असोज १४ संक्रमण पुष्टि भएको थियो । थप उपचारको लागि कोहलपुरस्थित नेपालगञ्ज शिक्षण अस्पतालमा उपचारका लागि रिफर गरिएको थियो । असोज १५ गते अपराह्न ४ बजे कोहलपुरमा भर्ना गरिएकी हुनको स्वास्थ्यमा सुधार हुन सकेन ।
यसैबीच चितवनको भरतपुर अस्पतालमा एकजना कोरोना संक्रमितको निधन भएको छ । कालिका नगरपालिका–७ जुटपानीका ६२ वर्षीय पुरुषको आज बिहान ६ः३५ बजे मृत्यु भएको अस्पतालले जनाएको छ ।
खोकी र श्वासप्रश्वासको समस्या देखिएर अस्पताल भर्ना भएका उनलाई असोज १६ गते कोरोना संक्रमण पुष्टि भएको थियो ।
त्यसैगरी कोरोना संक्रमणका कारण विराटनगरमा थप एकजनाको ज्यान गएको छ । कोसी अस्पतालको कोभिड-१९ उपचार केन्द्रमा उपचाररत विराटनगर महानगरपालिका– ९ का ६२ वर्षीय पुरुषको निधन भएको हो ।
कोभिड उपचार केन्द्रका प्रमुख डाक्टर दीपक सिग्देलका अनुसार उपचारको क्रममा आइतबार बिहान साढे ८ बजे उनको ज्यान गएको थियो । शुक्रबार कोरोना पोजेटिभ देखिएका पुरुषकाे स्वास्थ्यमा थप समस्या आएपछि विराट मेडिकल कलेजले उनलाई शनिबार कोसी अस्पताल रेफर गरेको थियो । उनी मधुमेहका बिरामी समेत थिए ।
