News Portal

  • कोरोना संक्रमणबाट स्वास्थ्यमा समस्या थपिँदै गएपछि ट्रम्प अस्पताल भर्ना

    डबली संवाददाता२०७७ असोज १७ गते
    ३६२ पटक

    काठमाडौं । कोरोना भाइरस संक्रमित अमेरिकी राष्ट्रपति डोनाल्ड ट्रम्पलाई अस्पताल भर्ना गरिएको छ । कोरोना भाइरस संक्रमणपछि स्वास्थ्यमा समस्या देखिन सक्ने भन्दै ट्रम्प अस्पताल भर्ना भएका हुन् ।

    ह्वाइट हाउसका अनुसार ट्रम्पलाई वाल्टर रीड नेश्नल मिलिट्री मेडिकल सेन्टरमा भर्ना गरिएको छ । कोरोनाको लक्षण देखिन थालेपछि ट्रम्प अस्पताल भर्ना हुन तयार भएका थिए । उनी विशेष हेलिकोप्टर चढेर अस्पताल पुगेका थिए ।

    कोरोना भाइरस संक्रमण पुष्टि भएको २४ घण्टा पछि ट्रम्पमा लक्षण देखिन थालेको बताइएको छ । अहिले ट्रम्पलाई हल्का ज्वरो आउँनुका साथै थकान पनि धेरै महसुस हुन थालेको बीबीसीले जनाएको छ ।

    ट्रम्पलाई कोरोना भाइरस संक्रमण भएसँगै  उनको चुनावी अभियान समेत प्रभावित भएको छ । अमेरिकाको नयाँ राष्ट्रपतिको लागि चुनाव हुन अब मात्र एक महिना छ । दोस्रो कार्यकालको लागि रिपब्लिकनको तर्फबाट ट्रम्प चुनावी मैदानमा छन् । ट्रम्पलाई कोरोना संक्रमण पुष्टि भएसँगै प्रतिस्पर्धी डेमोक्रेटिक पार्टीका जो बाइडेनले चुनावी अभियानलाई तीब्र पारेका छन् ।

    तर ट्रम्पलाई चिकित्सकहरुले आराम गर्न सुझाव दिएका छन् । ट्रम्पले अस्पतालबाटै सबै काम गर्ने ह्वाइट हाउसले जनाएको छ ।

    आफ्नी ३१ वर्षीया सल्लाहकार होप हिक्सलाई कोरोना भाइरसको सङ्क्रमण पुष्टि भएपछि गरिएको परीक्षणमा ट्रम्प दम्पतीकै रिपोर्ट पोजेटिभ आएको थियो ।

    प्रतिकृया दिनुहोस्