काठमाडौं । कोरोना भाइरसको संक्रमणबाट नेपाली सेनाका जवानको ज्यान गएको छ । कोरोना संक्रमणबाट सैनिकको ज्यान गएको यो पहिलो घटना हो ।

सैनिक प्रवक्ता सन्तोष बल्लभ पौडेलका अनुसार रामेछाप घर भई काठमाडौंमा कार्यरत ३४ वर्षीय सैनिक जवानको ज्यान गएको छ । लामो समयदेखि ब्लड क्यान्सरबाट पीडित उनमा कोरोना संक्रमण पुष्टि भएको थियो । कोरोनासँग मिल्दाजुल्दा लक्षण देखिएपछि उनको स्वाब संकलन गरी पीसीआर परीक्षण गर्दा रिपोर्ट पोजेटिभ आएको थियो ।

कोरोनाका कारण ज्यान गुमाएका सैनिक जवानको शव समेत नेपाली सेनाले व्यवस्थापन गरिसकेको छ । शनिबारसम्म नेपाली सेनाका  २ हजार ५६ जनामा कोरोना संक्रमण पुष्टि भएको छ ।

सैनिक मुख्यालयकाअनुसार नेपाली सेनाका २ हजार ५६ जना सैनिक कोरोना संक्रमित भएका छन् । जसमध्ये ४ सय १ जना कोरोनामुक्त भएर घर फर्किसकेका छन् भने एक जनाको ज्यान गयो ।