काठमाडौं । कोरोन कहरबीच भएको एक दिवसीय क्रिकेटमा अष्ट्रेलियाले इङ्ल्याण्डलाई पराजित गरेको छ । पहिलो एक दिवसीय क्रिकेटमा अष्ट्रेलिया १९ रनले विजयी भएको हो ।
इङ्ल्याण्डले २ सय ९५ रनको लक्ष्य पछ्याएर ९ विकेट गुमाउँदै २ सय ७५ रनमै सिमित भयो । साम विलिङ्सले शतकीय इनिङस् खेले पनि टिमलाई जिताउन सकेनन् । उनले १ सय १८ रन बनाए ।
त्यसैगरी जानी बेयरस्टोले ८४ र कप्तान इयान मोर्गानले २३ रन बनाए । अरु खेलाडीले भने उत्कृष्ट प्रदर्शन गर्न सकेनन् । यसअघि, अष्ट्रेलियाले ५० ओभरमा ९ विकेट गुमाएर २ सय ९४ रन बनाएको थियो ।
खराब सुरुवात गरेको अष्ट्रेलियाका लागि ग्लेन म्याक्सवेलले ७७ रनको योगदान दिँदै खेललाई उकासेका थिए । यस्तै मिचेल मार्शले ७३ रनको अर्धशतकीय इनिङस् खेले । छैठौं विकेटको लागि म्याक्सवेल र मार्शले १ सय २६ रनको साझेदारी गर्दै अष्ट्रेलियाको इनिङ्स उकासेका थिए । त्यस्तै मार्कुस स्टोनिसले ४३ रन जोड्दा मार्नुस लेबासचेन्नीले २१ रन बनाए ।
कप्तान आरोन फिन्च १६ रनमा आउट हुँदा ओपनर डेभिड वार्नर ६ रनमा पेभेलियन फर्किए । इङ्ल्याण्का मार्क उड र आर्चर जोफ्राले ३-३ विकेट लिए भने आदील राशिदले २ तथा क्रिस वोक्स्ले एक विकेट लिए ।
तीन खेलको श्रृङ्खला अन्तर्गतको दोस्रो एकदिवसीय आइतबार हुनेछ । यस्तै अन्तिम खेल बुधबार हुनेछ ।
