काठमाडौं । नेपाल पर्यटन वर्ष मनाउने अन्तिम तयारीमा जुटिरहेका बेला काठमाडौंमा बृहत राष्ट्रिय सम्मेलन शुरु भएको छ ।
सोनाका महासचिव सुरज खनालका अनुसार नेपाल भ्रमण वर्ष २०२० लाई लक्षित गर्दै ‘आर्किटेक्चरल रेस्पोन्सेस टू टूरिजम इन नेपाल’ भन्ने एजेण्डासहितको सम्मेलन आयोजना गर्न लागिएको हो ।
आज (शुक्रबार)देखि काठमाडौंको ठमेलस्थित अलफ्ट होटलमा सोसाईटी अफ नेप्लिज आर्किटेक्ट (सोना) को आयोजनामा शुरु हुने सम्मेलनमा देशभरका ५ सय भन्दा बढीको सहभागिता हुने बताइएकोे छ ।
पर्यटकीय क्षेत्र आर्किटेक्चरल हिसाबले जति मजबुत हुन्छ त्यति नै पर्यटकीय सम्भावना बढ्ने हुनाले यसतर्फ सरकारको ध्यानआकृष्ट गर्न सम्मेलन सहयोगी हुने आयोजकको दाबी छ ।
सम्मेलनले आर्किटेकटहरुको विगतको भूमिकाको समिक्षा गर्दै आगामी प्रयत्नलाई थप प्रभावकारी बनाउन सहयोग पुर्याउने सोनाकी अध्यक्ष अञ्जु मल्ल प्रधानले बताईन् ।
सम्मेलनमा शहरको परिकल्पना, विपदपछिको संरचना र पर्यटकीय पूर्वाधारमा नयाँ मार्ग प्रसस्त गर्न छुट्टा छुट्टै छलफल हुने छ । कम लागतमा नै संरचनालाई दीगो र बहुउपयोगी बनाउन आर्किटेक्टको भूमिका महत्वपूर्ण रहने भन्दै मुलुकको पर्यटन विकासमा टेवा पुर्याउन सम्मेलनको आयोजना गरिएको छ ।
सम्मेलन २ दिनसम्म चल्नेछ । सम्मेलनमा आर्किटेक्ट, व्यवसायी, सरकारी निकायका साथै नेपालका पर्यटन र निर्माणक्षेत्रसँग जोडिएका अग्रणी संस्थाहरुको समेत सहभागिता रहनेछ ।
