काठमाडौं । ऊर्जा, जलस्रोत तथा सिँचाइमन्त्री वर्षमान पुनले नेपाल विद्युत प्राधिकरणको सेवालाई प्रभावकारी बनाउन निर्देशन दिएका छन् ।
‘सहज सेवा, स्वच्छ नेपाल विद्युत प्राधिकरण’ राष्ट्रिय अभियानको शुक्रबार काठमाडौंमा शुभारम्भ गर्दै उनले प्राधिकरणको सेवा भरपर्दो र चुस्त बनाउन निर्देशन दिएका हुन् ।
सार्वजनिक संस्थानलाई पारदर्शी बनाउनुपर्ने भन्दै उनले पारदर्शी प्रशासनबाटमात्र सेवालाई प्रभावकारी बनाउन सकिने बताए । विद्युत पुग्न बाँकी १२ प्रतिशत क्षेत्रमा तीन वर्षभित्र सेवा र्पुयाइने उनको भनाइ छ ।
उनले राष्ट्रसेवक कर्मचारीलाई राज्यले विभेद नगरेको उल्लेख गर्दै सरकारले युनियनलाई सहकर्मीकैरुपमा व्यवहार गर्ने बताए । कर्मचारीमा नैतिकता र अनुशासन गुम्दै गएको भन्दै उनले सेवालाई मर्या्दित बनाउनुपर्नेमा जोड दिए ।
उनले ऊर्जाको विकासबाट आर्थिक क्षेत्रको विकास सम्भव हुने बताउँदै उत्पादित विद्युत भारत र बंगलादेशलाई बिक्री गर्न सकिने पनि बताए ।
