काठमाडौं । चलचित्र विकास बोर्डका अध्यक्ष केशव भट्टराइको निधन भएको छ । स्वास्थ्मा एकाएक समस्या देखिएपछि भट्टराइलाई अस्पताल लैजादै गर्दा निधन भएको हो ।
निर्माता तथा कलाकार भट्टराइको आइतबार राति मुटु दुखेको थियो । दुखाई बढ्दै गएपछि उपचारको लागि चावहिलस्थित ओम अस्पतालतर्फ लैजाँदै गर्दा बाटोमै निधन भएको थियो । अस्पतालले मृत घोषणा गर्दै हृ्दयघात हुन सक्ने भनेको थियो । तर निधन कारण औपचारिक रुपमा केही बताइएको छैन ।
भट्टराइले पछिल्लो पटक चलचित्र ‘यात्रा’ निर्माण गरेका थिए । उनले निर्माण गरेका थुप्रै चलचित्रले बक्स अफिसमा राम्रो व्यापारसमेत गरेका छन् । करिब एक वर्ष अगाडि चलचित्र विकास बोर्डको अध्यक्ष पदमा नियुक्त भट्टराइले केही राम्रा कामको सुरुवातसमेत गरेका थिए ।
भट्टराई तीसकाे दशकभन्दा लामो समयदेखि चलचित्र क्षेत्रमा सक्रिय थिए । उनले बनाएका चलचित्रमा ‘आफ्नो मान्छे, पाहुना, कर्मयोद्धा, देवरबाबु, छोडी गए पाप लाग्ला, सो सिम्पल’लगायत छन् । उनले दर्जनौं चलचित्रमा अभिनयसमेत गरेका छन् ।
