काठमाडौं । नेपाल विद्युत प्राधिकरणले भाडावालसँग चर्को दरमा विद्युत महशुल नउठाउन घरबेटीहरुलाई सचेत गराएको छ ।
नेपाल विद्युत प्राधिकरणका कार्यकारी निर्देशक कुलमान घिसिङले आइतबार काठमाडौंमा पकार सम्मलेन गर्दै मिटर बिलमा उल्लेख भएको भन्दा बढि महशुल भाडावालसँग घरबेटीहरुले लिने गरेको पाइएको भन्दै त्यसो नगर्न सचेत गराए ।
विद्युत प्राधिकरणको मिटर बिलमा उल्लेख गरिए भन्दा बढि रकम लिन नपाउने कानुनी व्यवस्था रहेको भन्दै उनले प्राधिकरणको वेबसाईटमा उल्लेख गरिए अनुसारको महशुल थाहा पाउन उपभोक्ताहरुलाई आह्वान गरे ।
आगामी चैत महिना भित्र ४५६ मेघावाटको माथिल्लो तामाकोसी जलविद्युत आयोजनाबाट विद्युत उत्पादन गर्ने लक्ष्य प्राधिकरणको रहेको छ ।
१११ मेघावाटको रसुवागढी जलविद्युत आयोजना, १४.८ मेघावाटको माथिल्लो सान्जेन विद्युत आयोजना र निजी क्षेत्रका आयोजनाहरुसमेत गरेर चालू आर्थिक वर्ष भित्र १ हजार मेघावाट विद्युत थप गर्ने योजना तय गरिएको उनले बताए ।
प्राधिकरणले चालू आर्थिक वर्ष भित्रै रुकुम पूर्व, कालिकोट, जुम्ला र बाजुरा गरी ४ जिल्लामा राष्ट्रिय ग्रिड पुर्याउने योजना तय गरेको छ । उनले चालू आर्थिक वर्ष भित्र देशभर स्मार्ट मिटर जडान कार्य सम्पन्न गर्ने प्रतिवद्धता पनि व्यक्त गरेका हुन् ।
