काठमाडौं । पूर्व शिक्षामन्त्री एवम् सत्तारुढ नेपाल कम्युनिष्ट पार्टी (नेकपा) का केन्द्रीय सदस्य डिआर पौडेलको मृत्यु भएको छ । शुक्रबार बिहान हृदयघातका कारण पौडेलको निधन भएको पारिवारिक स्रोतले जानकारी दिएको छ ।
माडीस्थित आफ्नै घरमा बिहान पौने ६ बजे हृदयघात भएर ढलेका पौडेललाई बगौडा अस्पताल पुर्याइयो । तर, त्यतिबेलासम्म उनी प्राणहीन बनिसकेका थिए । माडी नगरपालिका–५ मा पौडेलको घर निर्माणाधिन छ । घर ढलानका लागि उनी ५–६ दिन अगाडि माडी गएका थिए ।
नेकपा नेता पौडेल यसअघिको सरकारमा शिक्षा मन्त्री थिए । राजनीतिक वृत्तमा बौद्धिक नेताको छवि बनाएका पौडेल प्रचण्ड प्रधानमन्त्री हुँदा शिक्षा मन्त्री थिए । पौडेल हाल नेकपाको केन्द्रीय सदस्यको भूमिकामा थिए । पौडेलका दुई छोरी छन् । उनकी पत्नी गंगा बेल्वासे पनि नेकपाकी केन्द्रीय सदस्य हुन् ।
पौडेलको शव अहिले अस्पतालमा राखिएको छ । उनलाई श्रद्धाञ्जली दिन नेकपाका अध्यक्ष पुष्पकमल दाहाल प्रचण्ड तथा गृहमन्त्री रामबहादुर थापा बादल चितवन जादैछन् । उनको असामयिक निधनप्रति उनका आफन्त तथा शुभचिन्तक एवम उनी आवद्ध पार्टीका नेता कार्यकर्ताले श्रद्धाञ्जली ब्यक्त गरिरहेका छन् ।
