अनलाइन डबली
अदालतबाट दोषी ठहर भई सजाय तथा जरिवाना भुक्तानी गर्न बाँकी रहेका पाँच जना फरार प्रतिवादी पक्राउ परेका छन् । जिल्ला प्रहरी र मातहतका युनिटले उनीहरुलाई विभिन्न स्थानबाट पक्राउ गरेको हो ।
पक्राउ पर्नेहरूमा झुटा विवरण पेस गरी दोहोरो नागरिकता लिएको मुद्दाका गलकोट नगरपालिका वडा नं. ६ चरौदीका २५ वर्षीय पवन गौतम (प्रमोद), ७७ वर्षीय अणदत्त गौतम र ५० वर्षीय भविन्द्र गौतम रहेको जिल्ला प्रहरी कार्यालय बागलुङका सूचना अधिकारी प्रहरी नायव उपरिक्षक रामेश्वर त्वातीले जानकारी दिनुभयो ।
त्यस्तै, प्रहरीले घरेलु हिंसा मुद्दामा गलकोट नगरपालिका–९ बास्खोलाका ४५ वर्षीय लालबहादुर दर्जी र चेक अनादर मुद्दामा बरेङ गाउँपालिका वडा नं. २ हुग्दिशिरका भिमबहादुर श्रीसलाई पनि प्रहरीले नियन्त्रणमा लिएको छ ।
पक्राउ परेका सबै कसुरदारलाई जरिवाना असुली तथा बाँकी कैद भुक्तानीका लागि बागलुङ जिल्ला अदालतमा उपस्थित गराइएको छ । प्रहरीले संयुक्त विशेष अप्रेसन संचालन गरेर उनीहरूलाई पक्राउ गरेको त्वातीले बताउनुभयो ।
अदालतको फैसला कार्यान्वयनलाई चुस्त, दुरुस्त र प्रभावकारी बनाउँदै न्याय सम्पादनलाई पूर्णता दिन अभियान सञ्चालन गरिएको त्वातीको भनाई छ ।
