अनलाइन डबली
काठमाडौं । राष्ट्रिय स्वतन्त्र पार्टी (रास्वपा) को पहिलो राष्ट्रिय महाधिवेशन अन्तर्गत बन्दसत्र दिउँसो २ बजेदेखि सुरु हुने भएको छ ।
चितवनको भरतपुरमा जारी पहिलो राष्ट्रिय महाधिवेशन अन्तर्गत बन्दसत्र मंगलबार दिउँसो २ बजेदेखि सुरु हुने हो ।
प्रतिनिधि दर्ताको कार्य सुरु बिहान १० बजेदेखि नै भइसकेको छ । बिहान ११ः४५ बजे खानाको समय पश्चात् दिउँसो २ बजे पार्टी सभापति रवि लामिछानेले बन्दसत्रको औपचारिक आरम्भ गर्ने कार्यक्रम तय भएको छ ।
बन्दसत्र सुरु भएलगत्तै विभिन्न निकायका प्रतिवेदनहरूमाथि छलफल हुनेगरी कार्यतालिका सार्वजनिक गरिएको छ । जसअन्तर्गत २ः१० देखि २ः३० सम्म सुरुमा अनुशासन आयोगको प्रतिवेदन रमाकान्त रिमालले र त्यसपछि पार्टीको वित्तीय प्रतिवेदन कोषाध्यक्ष लिमा अधिकारीले प्रस्तुत गर्ने कार्यसूची छ ।
आजै दिउँसो ३ः४५ देखि ४ः४५ सम्म केन्द्रीय समितिबाट पारित विधान संशोधन प्रस्तावलाई सहमहामन्त्री विपिन कुमार आचार्यले प्रस्तुत गर्ने कार्यसूची रहेको छ ।
यसैगरी, अर्थ–राजनीतिक प्रस्तावना उपसभापति डा.स्वर्णिम वाग्लेले ४ः४५ देखि ५ः१५ सम्म प्रस्तुत गर्नेछन् भने सभापति रवि लामिछानेले राजनीतिक प्रतिवेदन पेश गर्नेछन् । सभापतिको प्रतिवेदनमाथि साँझ ६ः३५ सम्म छलफल र प्रस्तुतीकरणको कार्यक्रम रहेको छ ।
