अनलाइन डबली
काठमाडौं । अमेरिका स्थित मिसौरी राज्यको क्यान्सस सिटीमा फिफा विश्वकप २०२६ सुरु हुन केही दिनअघि भएको गोलीकाण्डमा नौ जना घाइते भएका छन् । घटना इङ्ग्ल्यान्ड राष्ट्रिय टोलीले विश्वकपका क्रममा प्रयोग गर्ने प्रशिक्षण केन्द्र नजिकै भएको अन्तर्राष्ट्रिय सञ्चारमाध्यमहरूले जनाएका छन् ।
क्यान्सस सिटी प्रहरीले शनिबार भएको उक्त घटनामा घाइते भएका सबै नौ जनाको अवस्था खतरामुक्त रहेको जनाएको छ । घाइतेमध्ये कम्तीमा तीन जनालाई उपचारका लागि स्थानीय अस्पताल लगिएको छ । घटनामा संलग्न व्यक्तिबारे अनुसन्धान जारी रहे पनि हालसम्म कुनै पनि संदिग्धलाई पक्राउ गरिएको छैन । गोलीकाण्ड इङ्ग्ल्यान्डको विश्वकप बेस क्याम्पका रूपमा तोकिएको स्वोप सोकर भिलेज प्रशिक्षण केन्द्रबाट करिब चार माइल दूरीमा भएको थियो। इङ्ग्ल्यान्ड टोली भने अझै क्यान्सस सिटी पुगेको छैन । टोलीले विश्वकपअघि फ्लोरिडाको अर्लान्डोमा कोस्टारिकाविरुद्ध मैत्रीपूर्ण खेल खेल्ने तालिका रहेको छ ।
घटनाबारे इङ्ग्ल्यान्ड फुटबल संघ (एफए) ले कुनै टिप्पणी गर्न अस्वीकार गरेको बताइएको छ । यस घटनाले फेरि एकपटक अमेरिकामा बढ्दो बन्दुक हिंसाको विषयलाई चर्चामा ल्याएको छ । ‘गन भायोलेन्स आर्काइभ’को तथ्यांकअनुसार सन् २०२५ मा अमेरिकामा ४०० भन्दा बढी सामूहिक गोलीकाण्डका घटना भएका थिए ।
सन् १९६६ मा पहिलो तथा अहिलेसम्मको एकमात्र विश्वकप उपाधि जितेको इङ्ग्ल्यान्ड यसपटक दोस्रो विश्वकप जित्ने लक्ष्यसहित मैदानमा उत्रँदैछ । प्रशिक्षकको टोलीमा कप्तान ह्यारी केन, जुड बेलिङ्घम, डेक्लान राइस, जोर्डन पिकफोर्ड र बुकायो साका जस्ता अनुभवी खेलाडी रहेका छन् । साथै कोबी माइनु, मोर्गन रोजर्स र टिनो लिभ्रामेन्टो जस्ता युवा प्रतिभालाई पनि टोलीमा समावेश गरिएको छ । विश्वकप २०२६ मा इङ्ग्ल्यान्ड समूह ‘एल’ मा क्रोएसिया, घाना र पनामासँग प्रतिस्पर्धा गर्नेछ ।
टोलीले जुन १७ मा डलासमा क्रोएसियाविरुद्ध खेल्दै आफ्नो अभियान सुरु गर्नेछ । अमेरिका, क्यानडा र मेक्सिकोले संयुक्त रूपमा आयोजना गर्ने विश्वकप २०२६ मा ४८ राष्ट्रका १,२४८ खेलाडीले १०४ खेलमा प्रतिस्पर्धा गर्नेछन् ।
