अनलाइन डबली
काठमाडौँ । इन्धनको लाग्ने करमा ५० प्रतिशत छुट दिएपनि सरकारले सार्वजनिक यातायात र ढुवानीको भाडा बढाएको छ ।
इन्धनको मूल्यमा बृद्धि भएको भन्दै सरकारले सार्वजनिक यातायातको भाडा १६.७१ र मालवाहक सवारी साधनको भाडा करिब २२ प्रतिशतले बढाएको छ । मालवाहक सवारीको पहाडी र तराई क्षेत्रगरी फरकफरक भाडा बटाएको छ ।
सरकारले पहाडी क्षेत्रमा चल्ने मालवाहक सवारीको भाडा २१.६८ प्रतिशत र तराई क्षेत्रमा चल्ने मालवाहक सवारीको भाडा १५.७५ प्रतिशतले बढाएको छ ।
यातायात व्यवस्था विभागले भाडा समायोजनको स्वीकृतिका लागि मन्त्रालयमा प्रस्ताव पठाएको थियो । विभागको प्रस्तावलाई भौतिक पूर्वाधार तथा यातायातमन्त्री सुनिल लम्सालले सदर गरेसँगै अब विभागले औपचारिक रूपमा सूचना जारी गरेपछि नयाँ भाडा लागू हुनेछ ।
इन्धनको लाग्दै आएको करमा ५० प्रतिशत छुट दिएपछि भाडा घट्ने अपेक्षा गरिएको बेला सरकारले व्यवसायीको हितमा हुने गरी भारी मात्रामा भाडा बढाएको भन्दै विरोध हुन सुरु भएको छ ।
