अनलाइन डबली
काठमाडौँ । अमेरिकी राष्ट्रपति डोनाल्ड ट्रम्पले अन्तर्राष्ट्रिय फौजदारी अदालत (आईसीसी) माथि प्रतिबन्ध लगाउने आदेश जारी गरेका छन्। इजरायली प्रधानमन्त्री बेन्जामिन नेतान्याहू र पूर्वरक्षामन्त्री योभ गालान्टविरुद्ध पक्राउ जारी गरेपछि ट्रम्पले प्रतिबन्ध लगाउने आदेश जारी गरेका हुन् ।
‘आईसीसीले आफ्नो अधिकारको दुरुपयोग गरेको छ। अमेरिका र इजरायल यस अदालतका सदस्य होइनन् र यसलाई मान्यता पनि दिँदैनन्’ ट्रम्पले भने । उनले आईसीसीका अधिकारी, कर्मचारी र उनीहरूका परिवारका सदस्यका साथै अनुसन्धानमा सहयोग गर्ने जो कोहीको सम्पत्ति रोक्का र यात्रा प्रतिबन्ध लगाउने आदेश पनि दिएका छन् ।
प्रतिबन्धमा समावेश गरिएका सबैको अमेरिकामा रहेको सबै सम्पत्ति रोक्का गरिनेछ। साथै, उनीहरूलाई अमेरिका जानबाट पनि रोक लगाइनेछ । भिसा दिइने छैन।
नेतान्याहू अमेरिका भ्रमणमा छन् । उनले फेब्रुअरी ४ मा ट्रम्पलाई र फेब्रुअरी ६ मा सांसदहरूलाई भेटेका थिए । नोभेम्बर २१ मा आईसीसीले नेतान्याहू र ग्यालान्टविरुद्ध युद्ध अपराध, मानवअधिकार उल्लङ्घन र गाजामा नरसंहारको आरोपमा पक्राउ वारेन्ट जारी गरेको थियो ।
अघिल्लो कार्यकालमा पनि राष्ट्रपति ट्रम्पले २०२० मा आईसीसीमाथि प्रतिबन्ध लगाएका थिए।
अन्तर्राष्ट्रिय फौजदारी अदालतको मुख्यालय हेगमा छ। रोम सम्झौत अन्तर्गत बेलायत, क्यानडा र जापानसहित १२३ देशहरू अन्तर्राष्ट्रिय फौजदारी अदालतका सदस्य छन् ।
