अनलाइन डबली
काठमाडौँ । अखिल क्रान्तिकारीमा ३२ वर्षे उमेरहद लागु हुने भएको छ । निर्वाचनको अन्तिम परिणमअनुसार उमेरदह पक्षधर २१ मतले विजयी बनेको छ ।
निर्वाचन समितिका अनुसार कुल २३९८ मतदातामध्ये १७७९ जनाले मत खसालेका थिए । जसमा ३२ वर्ष उमेरहद लागु गर्नुपर्छ भन्ने पक्षमा ९०० मत परेको थियो भने विपक्षमा ८७९ मत परेको थियो ।
योसँगै निवार्तमान पदाधिकारीमध्ये एकजना मात्रै आगामी अध्यक्षको उम्मेदवार बन्न पाउने भएकी छन् । उमेरहदका कारण अधिकांश पदाधिकारी बिदा हुने भएपनि निवर्तमान उपाध्यक्ष प्रविना अधिकारी भने अगामी अध्यक्षको लागि उम्मेदवार बन्न पाउने भएकी हुन् ।
अहिले १ सय ७८ सदस्यीय पदाधिकारीमध्ये अधिकारीबाहेक सबै बिदा हुने भएका छन् ।
अध्यक्षका दाबेदार रहेका निवर्तमान उपाध्यक्षहरू इन्द्र भुसाल, जीपी मैनाली, तुकमान महरा, मिलन एम।सी, लक्ष्मीप्रसाद जोशी, नरेश रेग्मी, गजेन्द्रप्रसाद देव, राजकुमार याक्खो, मदन भुल, मदन भट्टराई, सूर्यनारायण साह, पवन कार्की, क्षितिज सापकोटा, नारायण खनाल, अम्बरराज शाही, अच्युत भट्ट, केशव रावल उमेरहदका कारण बिदा हुने भएका छन् ।
त्यसैगरी निवर्तमान महासचिव दीपेश पुन पनि उमेरहदका कारण बिदा हुने भएका छन् भने उपमहासचिवमा ७ जना र सचिवमा १० जना जति अध्यक्षको उम्मेदवार बन्न सक्ने बताइएको छ ।
उमेरहद लगाउने कि खुला गर्ने विवाद देखिएपछि शनिबार निर्वाचन भएको थियो ।
आगामी माघ ५ गतेबाट नयाँ नेतृत्वका चुन्नका लागि निर्वाचन प्रक्रिया सुरु हुने अखिल क्रान्तिकारीले जनाएको छ ।
