अनलाइन डबली
काठमाडौँ । प्रहरीले अनुसन्धान प्रतिवेदन बुझाएपनि राष्ट्रिय स्वतन्त्र पार्टीका सभापति रवि लामिछानेलाई अझै हिरासतमै राख्ने सरकारले तयारी गरेको छ । त्यसको लागि अन्य जिल्लामा थुनछेकको लागि भन्दै म्याद थपेर थुनामै राख्ने तयारी भइरहेको छ ।
पछिल्लो पटक थप भएको ५ दिनको म्याद सकिएपछि आज प्रहरीले रविलाई अदालतमा उपस्थित गराइने जिल्ला प्रहरी कार्यालय कास्कीले जनाएको छ । रविविरुद्ध पुस ५ मा जिल्ला अदालत कास्कीमा अभियोगपत्र दायर गर्ने सरकारी वकिल कार्यालयले तयारी गरिरहेको बताइएको छ ।
प्रहरीले रविविरुद्ध संगठित अपराध, सम्मत्ति शुद्धीकरण र सहकारी ठगी प्रकरणमा मुद्दा चलाउन सिफारिस गरेको छ । कास्की प्रहरीले रविसहित ५१ जनाविरुद्ध मुद्दा चलाउन रायसहितको प्रतिवेदन आइतबार पेश गरेको छ ।
सम्पत्ति शुद्धीकरण मुद्दामा ९० दिन अनुसन्धान गर्न पाउने समय हुनाले पुस ५ मा रविविरुद्ध अभियोग पत्र दायर गर्ने सरकारी कार्यालयले तयारी गरिरहेको छ ।
अन्य जिल्लामा घुमाएर रविलाई अझै तीन महिना थुनामै राख्न लागेको भन्दै रास्वापका नेताहरुले सरकारको विरोध गरेका छन् ।
