अनलाइन डबली
काठमाडौं । रुस र जनवादी गणतन्त्र कोरियाले आफ्नो सार्वभौमसत्ता र सुरक्षालाई खतरामा पार्न सक्ने तेस्रो देशहरूसँग कुनै पनि सम्झौता नगर्ने प्रतिबद्धता जनाएका छन् ।
रुसी समाचार एजेन्सी तासका अनुसार रुसी राष्ट्रपति भ्लादिमिर पुटिनको कोरियाको राजकीय भ्रमणका क्रममा दुई देशबीच बृहत रणनीतिक साझेदारीमा सहमति भएको छ ।
दुई देशले सात बुँदे सहमति जारी गर्दै कुनैपनि देशविरुद्ध आक्रामकताको अवस्थामा तत्काल पारस्परिक सहयोग प्रतिवद्धता पनि सहमतिमा उल्लेख छ ।
पुटिन र कोरियाका सर्वोच्च नेता किमजोङ उनले हस्ताक्षर गरेको सहमतिमा रुस र कोरियाले द्विपक्षीय व्यापारलाई बढावा दिन र आर्थिक सहयोगका लागि अनुकूल अवस्था सिर्जना गर्ने पनि सहमति भएको छ ।
त्यसैगरी मस्को र प्योङयाङ अन्तरिक्ष अन्वेषण, आणविक ऊर्जाको शान्तिपूर्ण प्रयोग, एआई, र आईटी क्षेत्रमा सहयोग विकास गर्न सहमत भएका छन् ।
दुई देशले ‘विकृत सूचना र सूचना उत्तेजकहरू’ लाई रोक्न आमसञ्चारको क्षेत्रमा सहयोगलाई बलियो बनाउने पनि सहमति गरेका छन् ।
रसिया र उत्तर कोरियाले युद्ध रोक्न र शान्ति सुनिश्चित गर्न रक्षा क्षमतालाई बलियो बनाउन नयाँ उपायहरूको प्रणाली सिर्जना गर्ने सहमति गरेका छन् ।
