अनलाइन डबली
काठमाडौं । नेकपा (माओवादी केन्द्र) का उपमहासचिव जनादर्न शर्मा ‘प्रभाकर’ ले भूकम्प पीडितको लागि पहिलो चरणको राहत सम्बन्धि कार्य स्थगित गरेर दोस्रो चरणको अस्थायी आबास निर्माणकाे सुरु भएको बताएका छन् ।
रातदिन रुकुम पश्चिमका भूकम्प पीडितकै लागि खटिरहेका प्रभाकरले पहिलो चरणको कार्यमा सहयोग गर्ने नेपाल सरकारसँगै सहयोग संस्था तथा व्यक्तिहरुलाई धन्यवाद समेत दिएका छन् । पहिलो चरणको राहत समबन्धी अनुगमन र आवश्यक सामाग्री आपूर्ती कार्य पूरा भएको प्रभाकरले बताएका छन् ।
माओवादी केन्द्रको संगठन विभाग प्रमुख समेत रहेका प्रभाकरले आजबाट भत्केका संरचना हटाउने र अस्थायी आवासको निर्माणको प्रक्रिया थालनी गर्ने जानकारी दिएका छन् । उनले उद्योगहरुले जाजरकोट, रुकुम पश्चिम र सल्यानको लागि जस्तापाता उपलब्ध गराउन तीनै जिल्लालाई पायक पर्नेगरी सम्पर्क कार्यालय स्थापना गर्न समेत आग्रह गरेका छन् ।
त्यसैगरी ट्वाइलेट प्यान, सुधारिएको चुलो र सिमेन्ट बोर्डलगायतका सामाग्री अव आवश्यक भएको भन्दै प्रभाकरले सहयोग गर्न अपील समेत गरेका छन् ।
सामाजिक संजालमा प्रभाकरले लेखेका छन्ः
आजबाट पहिलो चरणको राहात सम्बन्धि अनुगमन कार्य यही स्थगित गरिएको छ । पहिलो चरणमा आवश्यक सामाग्रीहरु आपुर्ति गर्ने कार्य मुलभूत रूपमा पूरा भएको छ। अति आवश्यक सामाग्री आपूर्ति गर्ने कार्य जारी रहनेछ।
नेपाल सरकारलगायत सहयोगी संघसंस्थालाई हार्दिक आभार व्यक्त गर्दछु । अब भोलीदेखि भत्केका संरचना हटाउने र अस्थायी आवासको निर्माण प्रक्रिया थालनी गर्नेछौँ। उद्योगहरुले जाजरकोट, रुकुम पश्चिम र सल्यान जिल्लाका लागि जस्तापाताहरू उपलब्ध गराउन तिनै जिल्लालाई पायक पर्नेगरी सम्पर्क कार्यालय स्थापना गर्न अनुरोध गर्दछु। सहयोगी संघ संस्थाहरुलाई ट्वाइलेट प्यान, सुधारिएको चुलो र सिमेण्ट बोर्ड लगायतका आवश्यक सामाग्रीहरु उपलब्ध गराउन हार्दिक अपील गर्दछु ।
