अनलाइन डबली
धनगढी । एक सय दिनपछि सुदूरपश्चिम प्रदेश सरकारमा नेकपा माओवादी केन्द्र सहभागी भएको छ । माओवादी दुई मन्त्री र एक राज्यमन्त्रीसहित सरकारमा सहभागी भएको हो ।
मुख्यमन्त्री कमल बहादुर शाहको सिफारिसमा प्रदेश प्रमुख देवराज जोशीले शनिबार नयाँ मन्त्रीहरूलाई शपथ ग्रहण गराएका थिए । शनिबारै नेपाली काँग्रेसबाट थप एकजना मन्त्रीले शपथ लिएका छन् ।
माओवादी केन्द्रबाट झपट साउदले सरकारको नेतृत्व गर्नेछन् । उनले सामाजिक विकास मन्त्रालयको जिम्मा पाएका छन् । रमेश धामीलाई उद्योग, पर्यटन, वन तथा वातावरण मन्त्रालयको जिम्मेवारी दिइएको छ भने सोही मन्त्रालयमा गीतादेवी माललाई राज्यमन्त्रीको जिम्मेवारी दिइएको छ ।
यसअघि २०७९ को माघ २६ गते मुख्यमन्त्री नियुक्त भएका शाहले नेपाली कांग्रेसकै प्रकाशबहादुर देउवालाई भौतिक पूर्वाधार विकास र नेकपा एकीकृत समाजवादीका नरेश कुमार शाहीलाई आर्थिक मामिला मन्त्रालयको जिम्मेवारी दिएका थिए ।
सत्तारुढ दल नागरिक उन्मुक्ति पार्टीले मागेको मन्त्रालय नपाएपछि शनिबार सरकारमा सहभागी भएन । नाउपाले आफूले सामाजिक विकाससहित दुई मन्त्रालय पाउनुपर्ने बताउँदै आएको थियो । तर, मुख्यमन्त्री शाहले मागेको मन्त्रालय दिन कठिन हुने बताएपछि अन्तिममा आएर नाउपाले सरकारमा सहभागी नभएको हो ।
गठबन्धनमा नाउपालाई भूमि व्यवस्था कृषि तथा सहकारी मन्त्रालय दिने सहमति भएको थियो । अहिले उक्त मुख्यमन्त्री शाहले आफू मातहत राखेका छन् ।
