अनलाइन डबलीकाठमाडौँ । राष्ट्रिय स्वतन्त्र पार्टीको केन्द्रीय समिति बैठक सकिएको छ । सरकारलाई दिएको समर्थन फिर्ता लिने वा सरकारमा सहभागी हुने विषयमा निर्णय लिन बैठक बसेको थियो ।
बैठकले पार्टीका ३६ विभागको जिम्मेवारी समेत तोकेको प्रवक्ता मुकुल ढकालले जानकारी दिए । सरकारलाई दिएको समर्थनबारे निर्णय लिन शुक्रबार बस्ने केन्द्रीय समिति र संसदीय दलको बैठक बस्ने ढकालले जानकारी दिए ।
रविले पुनः उपप्रधानसहित गृह मन्त्रालय पाए सरकारमा सहभागी हुने बताइएको छ । त्यसबारे प्रधानमन्त्री प्रचण्डको औपचारिक धारणाको माग गरेको एक नेताले बताए । त्यसको लागि शुक्रबारसम्म सरकारलाई समय दिएको बताइएको छ ।
बैठकमा सभापति लामिछानेले आफ्ना मागबारे प्रधानमन्त्री सकारात्मक भएको जानकारी दिएको एक नेताले बताए । प्रधानमन्त्री सकारात्मक भएकोले शुक्रबारसम्म पर्खिनुपर्ने धारणा लामिछानेले राखेको बताइएको छ ।
प्रधानमन्त्री प्रचण्डले पनि सोमबार चितवनको एक कार्यक्रममा लामिछाने सरकारमा सहभागी हुन सकारात्मक भएको बताएका थिए ।
