अनलाइन डबली
काठमाडौँ । खेलाडीहरुको हौसला बढाउन प्रधानमन्त्री प्रचण्ड त्रिवि क्रिकेट मैदान पुगेका छन् । नेपाल र युएईबीचको खेल हुन गइरहेको बेला प्रधानमन्त्री प्रचण्ड खेलमैदान पुगेका हुन् ।
नेपाल आजको खेलमा जित निकाल्दै विश्वकप छनोटमा सोझै स्थान बनाउने योजनामा छ। लिग २ मा नेपाल ३५ खेलमा ३८ अङ्क सहित तालिकाको चौथो स्थानमा छ । युएई ३५ खेलबाट ३३ अङ्क सहित तालिकाको छैटौँ स्थानमा छ ।
आज आईसीसी विश्वकप लिग–२ अन्तर्गत त्रिकोणात्मक एकदिवसीय सिरिजको अन्तिम खेल हो । युएईले टस जितेर ब्याटिङ रोजेपछि नेपालले बलिङ गरिरहेको छ ।
खेल हेर्न आएका समर्थकहरूको त्रिवि क्रिकेट मैदान बाहिर भिड छ । क्यानले बुधबार नै सबै टिकट बिक्री भएको बताए पनि केही समर्थक भित्र छिर्न पाउनुपर्ने माग सहित मैदान बाहिर छन् । खेल सुरु हुनु पूर्व नै हजारौँ सख्यामा समर्थकहरूको उपस्थित भइसकेको छ ।
