अनलाइन डबली
काठमाडौं । अखिल क्रान्तिकारीले जनक शिक्षा सामग्री केन्द्रका प्रमुख धनबहादुर केसीलाई कालोमोसो दलेका छन् । विप्लव नेतृत्वको नेपाल कम्युनिस्ट पार्टी निकट अखिल क्रान्तिकारीका कार्यकर्ताहरुले आइतबार केन्द्रका कर्णाली प्रदेश प्रमुख केसीलाई कालोमोसो दलेको हो ।
शैक्षिक सत्र सुरु भएको लामो समयसम्म पनि कर्णालीमा पाठ्यपुस्तक नपुर्याएको भन्दै कालोमोसो दलेको क्रान्तिकारीले जनाएको छ । संगठनका केन्द्रीय सदस्य समेत रहेका सुर्खेत जिल्ला इञ्चार्ज तुलाराम तिरुवाले एक विज्ञप्ति जारी गर्दै केसीलाई जनकारवाही गरिएको बताए ।
मनोमानी तरिकाले पुस्तक वितरण गरी पुस्तक व्यवसायीसँग करोडौं कमिसन खाएको, हुम्ला, जुम्ला, डोल्पा लगायतका दुर्गम जिल्लाको विल बनाई किताब सुर्खेतमा वितरण गरेको र लाखौं रकम ढुवानीबाट कमिसन खाएको अखिल क्रान्तिकारीले आरोप लगाएका छन् । साथै उनले सरकारी कार्यालयलाई निजी पैत्रिक सम्पतिको रुपमा प्रयोग गर्ने र कार्यलयमा विवाह, व्रतबन्ध जस्ता कार्यक्रम गरेको आरोप लगाए ।
अखिल क्रान्तिकारीका कार्यकर्ताहरुले केसीको कार्यकक्षमै कालोमोसो दलेको सुर्खेत प्रहरीले जनाएको छ । कालोमोसो दल्नेहरुको खोजीकार्य भइरहेको सुर्खेत प्रहरीले जनाएको छ ।
