अनलाइन डबलीकाठमाडौँ । पछिल्लो समयमा बलात्कार मुद्धाको हदम्याद हटाउनु पर्ने माग बढेको छ । सांसहरुले हदम्याद हटाउन प्रस्ताव पेश गरेका थिए । आज बसेको संसद्को कानुन, न्याय तथा मानव अधिकार समितिले बलात्कार मुद्दामा तीन बर्षपछि पनि उजुरी दिन पाउने गरी हदम्याद बढाउने निर्णय गरेको छ ।
बालिगको हकमा भने विद्यमान कानुन नै लागु हुनेछ भने नाबालिगको हकमा दुई वर्ष बढाउने समितिमा सहमति जुटेको छ । सहमितअनुसार अब कुनै पनि बलात्कारमा परेका नाबालिगले बालिग भएको (१८ वर्ष पूरा भएको) तीन वर्षपछि अर्थात् २१ वर्षको उमेर हुँदासम्म उजुरी गर्नु पाउनेछन् । बालिगको हकमा घटना भएको दुई वर्षभित्र उजुरी गर्नुपर्नेछ ।
समितिमा केही दिनदेखि यौन हिंसाविरुद्धका केही ऐन संशोधन गर्न बनेको विधेयकमाथिको छलफल चलिरहेको थियो । छलफलमा सहभागी केही सांसदले हदम्याद हटाउनुपर्ने माग राखेका थिए । प्रतिनिधिसभा बैठकमा भएका छलफलमा समेत केही सांसदले हदम्याद हटाउनुपर्ने धारणा राखेका थिए । महिला अधिकारकर्मीले पनि हदम्याद हटाउनु माग गर्दै आएका थिए ।
थुनामा रहेको वा अपहरणमा रहेको अवस्थामा बलात्कारमा परेको भए थुनामुक्त वा अपहरणमुक्त भएको दुई वर्ष तीन महिनाभित्र उजुरी गरिसक्नुपर्ने व्यवस्था गर्न पनि सहमति जुटेको छ ।
