काठमाडौं । क्लासिक टेकले दूलर्भ रोगबाट पिडित १३ महिने बालिकाको उपचारको लागि १० लाख रुपैयाँ सहयोग रकम हस्तान्तरण गरेको छ । नेपालको अग्रणी र ठूलो नेटवर्क सेवा प्रदायक कम्पनी क्लासिक टेकले निकै दूर्लभ रोग स्पाइनल मस्कुलर एट्रोफी टाइप १ बाट पीडित सियोना श्रेष्ठको उपचारमा सहयोग पुर्याउने उद्देश्यले १० लाख रुपैयाँ सहयोग प्रदान गरेको हो ।
सामाजिक उत्तरदायित्व अन्तरगत सहयोग गरेको कम्पनीले जानकारी दिएको छ । कम्पनीले उनको उपचारका लागि स्थापना गरिएको बैंक खातामा सिधै अनलाइन पेमेन्टमार्फत रकम मंगलबार प्रदान गरेको छ। सियोनाको उपचारका लागि क्लासिक टेकका सम्पूर्ण कर्मचारीहरुले पनि सक्दो सहयोग प्रदान गरेका छन् ।
क्लासिक टेकले सामाजिक संस्थागत उत्तरदायित्व अन्तरगत हरेक वर्ष विभिन्न कार्यक्रमका साथ रक्तदान कार्यक्रम समेत आयोजना गर्दै आएको छ । यसअघि पनि ब्लड क्यान्सरबाट पीडित एक बालकको उपचारको लागि क्यान्सर अस्पताल हरिसिद्धिमा लगेर सम्पूर्ण खर्चसहित उपचार गराएको थियो ।
त्यसैगरि ती बालकको लागि थप सहयोग समेत जुटाएको थियो । यसपटक पनि कम्पनीले सामाजिक कार्यलाई निरन्तरता दिँदै सियोनाको उपचारको लागि रकम सहयोग गरेको हो ।
सियोनाको उपचारको लागि २० करोड रकम खर्च हुने अनुमानका साथ उनका आमा बुबाले विभिन्न फण्डिङमार्फत रकम संकलन गरिरहेका छन् । यसको लागि गोफण्डमी डटकम मार्फत रकम संकलन भईरहेको छ भने सिधै उनको नाममा खोलिएको बैंक खातामा समेत रकम जम्मा गर्न सकिने व्यवस्था गरिएको छ । यसका साथै उनलाई आर्थिक सहयोग गर्न चाहनेले ईसेवाबाट समेत रकम पठाउन सक्नेछन् ।
सहयोग हस्तान्तरणको बारेमा बोल्दै कम्पनीका प्रमुख सेल्स एण्ड मार्केटिङ अफिसर बिनय अधिकारीले आवश्यक २० करोड सहयोगमा सहयोगहरु थपेको बताए ।
”तपाईँ हाम्रो सानो सानो सहयोगले नानीको जीवन बचाउन सक्छ । हामीले हरेक वर्ष सामाजिक कार्यलाई अगाडि बढाईरहेका छौं । गतवर्ष क्यान्सर पीडित बालकलाई सहयोग गरेका थियौं भने यो वर्ष स्पाइनल मस्कुलर एट्रोफीबाट टाइप १ बाट पीडित १३ महिने सियोना श्रेष्ठलाई सहयोग गरेका छौं। आगामी दिनमा पनि हामी सामाजिक कार्यमा सँधै अगाडि बढेर काम गर्नेछौं” अधिकारीले भने । क्लासिक टेकले बालिकाको उपचारको सहयोगको लागि आधिकारीक सोशल मिडियामार्फत अपिल समेत गरेको छ ।
नेपालको अग्रणी र ठूलो इन्टरनेट नेटवर्क सेवा प्रदायक कम्पनीले देशभर आफ्नो इन्टरनेट सेवालाई तिब्रगतिमा बिस्तार गर्दै आएको छ । कम्पनी आफ्नो क्षेत्रमा अग्रणी कम्पनीको रुपमा चिनिन्छ।
सहयोग गर्न चाहनेहरुले Siyona Shrestha को बैंक अफ काठमाडौंको परासी शाखामा रहेको A/C No: 206500000031524 नम्बरमा वा इसेवाको Id: 9847206466 9816457809 सहयोग गर्न सक्नेछन् ।
