काठमाडौं । भारतमा कोरोना भाइरस नियन्त्रण बाहिर गएको छ । मंगलरबा विहानसम्म आउँदा २० हजार जनाले ज्यान गुमाएका छन् । पछिल्लो २४ घण्टामा २२ हजारभन्दा बढीमा कोरोना संक्रमण भएको पुष्टि भएको छ ।
विश्वको बढी खतरा रहेका देशहरुको तेस्रो सूचीमा उक्लिएको भारतमा पछिल्लो २४ घण्टामा थप ४६७ जनाको ज्यान गएको छ । योसँगै भारतमा कोरोनाका कारण ज्यान गुमाउनको संख्या २० हजार नाघेको छ । भारत सरकारले औपचारिक रुपमा सार्वजनिक गरेको विवरण अनुसार मंगलबार विहानसम्म कोरोनाबाट ज्यान गुमाउनको संख्या २० हजार १८४ पुगेको छ ।
त्यसैगरी संक्रमितको संख्या सात लाख नाघेको छ । अहिलेसम्म भारतमा कोरोना भाइरसबाट संक्रमित हुनेको संख्या सात लाख १९ हजार ६६५ पुगेको छ । पछिल्लो २४ घण्टामा मात्र भारतमा कोरोना भाइरसका २२ हजार २५२ जनामा कोरोना संक्रमण पुष्टि भएसँगै यो संख्या पुगेको हो ।
भारतीय संचारमाध्यमहरुका अनुसार सबैभन्दा प्रभावित महाराष्ट्रमा अहिलेसम्म कोरोना भाइरसका दुई लाख ११ हजारभन्दा बढी संक्रमित भएका छन् । त्यस्तै ९ हजार २६ जनाले ज्यान गुमाएका छन् । त्यस्तै तामिलनाडुमा पनि एक लाख १४ हजारभन्दा धेरै संक्रमित भएका छन् भने ज्यान गुमाउने संख्या एक हजार ५ सय ७१ पुगेको छ ।
त्यसैगरी संक्रमित र ज्यान गुमाउनेमा सबैभन्दा बढी राजधानी दिल्लीमा रहेका छन् । एक लाखभन्दा धेरै संक्रमित हुँदा ३ हजार ११५ जनाले ज्यान गुमाएका छन् । उत्तर प्रदेशमा अहिलेसम्म २८ हजारभन्दा बढीमा कोरोना संक्रमण भएको छ भने ८०९ जनाले ज्यान गुमाएका छन् । पश्चिम बंगालमा पनि २२ हजारभन्दा धेरै संक्रमित फेला परेका छन् भने ७७९ जनाले ज्यान गुमाएका छन् ।
त्यसैगरी बिहार सरकारले तुलनात्मक रुपमा कोरोनालाई नियन्त्रणमा राखेको छ । अहिलेसम्म १२ हजारमा कोरोना संक्रमण भएको छ भने ९७ जनाले ज्यान गुमाएका छन् । भारतमा संक्रमणको तुलनामा निको हुनेको संख्या कम रहेपनि अहिलेसम्म चार लाख ३९ हजार ९४८ जनाले कोरोनासँग जितेर घर फर्केका छन् ।
