काठमाडौं । पाल्पाको तिनाउ गाउँपालिका-५ चौबिसमाइलमा एउटा जिप दुर्घटना अवस्थामा फेला परेको छ ।
घट्नास्थलमा २ जनाको शव पनि भेटिएको छ । जिल्ला प्रहरी कार्यालय पाल्पाका अनुसार मृतकको सनाखत हुन सकेको छैन । दुवै शव पुरुषको हो ।
बुधबार राति जीप दुर्घटना भएको हुन सक्ने अनुमान गरिएको छ । बुटवलबाट तानसेनतर्फ आउँदै गरेको लु १ ज ४२०९ नं.को जिप सिद्धार्थ राजमार्गअन्तर्गत चौबिसमाइलस्थित सडकबाट करिब २ सय मिटर तल भीरमा खसेको प्रहरीको भनाइ छ ।
भीरमा शव अड्किएको अवस्थामा फेला परेको र अहिले शव निकालेर जिल्ला अस्पताल पाल्पामा पोष्टमार्टमको लागि ल्याउने तयारी भइरहेको छ जिपमा अरू पनि सवार भए नभएको बारे खुलेको छैन ।
यद्यपि, घट्नास्थलमा खोजीकार्य जारी रहेको र बिहानपख घाँस काट्न गएकाहरुले जिपको छत भीरमा देखेपछि प्रहरीलाई खबर गरेका थिए ।
लगत्तै जिल्ला प्रहरी कार्यालयबाट प्रहरी नायब उपरीक्षक कृष्णराज सापकोटाको नेतृत्वमा टोली घट्नास्थल पुगेर उद्धार गरेको हो । थप विवरण आउन बाँकी छ ।
