अनलाइन डबलीकाठमाडौं । काठमाडौंको जयवागेश्वरीमा नवदुर्गा भवानीको जात्रा सुरु भएको छ । भक्तपुर नगरको ऐतिहासिक महत्त्व बोकेको जीवित रुपमा मान्दै आएको प्रसिद्ध नवदुर्गा भवानीको जात्रा आज शनिबार रातिबाट सुरु भएको हो । जात्रा भोली आइतबार रातिसम्म मनाइन्छ ।
मध्यरातसम्म भवानीको पूजा हुने भवानी जात्रामा तान्त्रिक विधिद्वारा पूजाअर्चना गर्ने गरिन्छ । नवदुर्गा जात्रा तान्त्रिक विधिमा अनुष्ठान गर्ने गरिन्छ । वर्षको ८ महिनासम्मको मकुण्डोसहितको जात्रा हरेक वर्ष यसै समयमा दुई दिन पशुपतिनाथ मन्दिर र नवदुर्गा देवगणको भेटघाट तथा प्रसाद आदानप्रदान गर्ने परम्परा परापुर्वकाल देखि चल्दै आएको छ ।
पशुपतिनाथका मूल पुजारीबाट नवदुर्गा भवानीलाई बिधिपुर्बक पूजा गरी पशुपतिको जल र मूल प्रसाद भैरवको हातमा चढाउने परम्परा रहेको छ ।
पशुपतिको मूलचोकमा देवगणको नाचसँगै भित्रका सम्पूर्ण देवतालाई भेटघाट गर्ने र पूर्वपट्टि रहेको गुजेश्वरी देवतालाई नाचको रूपमा भेट गरी दक्षिणतर्फ रहेको शिवालय चोकमा (मुः बाहा ल्युइकेगु ) जात्रा गरी पशुपति विकास क्षेत्रको मूल पूजा ग्रहण गर्ने चलन छ ।
यसैगरी, जयवागेश्वरी मन्दिरमा पुगेर यस वर्षको सर्वप्रथम माछा मार्ने जात्राको लागि खः जुयेगु (बास बस्ने) र रात्रिको नाच प्रदर्शन गर्ने गरिन्छ । सोही दिन भोलिपल्ट बिहानदेखि बाराही नाच, सिम दुमको माछा मार्ने नाचसँगै महाकाली नाच र सेतो भैरवले माछा मार्ने जात्रा गरी बेलुकासम्ममा सम्पूर्ण नाच सम्पन्न गरी पुनः भक्तपुर नपामा फर्किने छ ।
यसरी फर्किदा सोही स्थानमा देवगणहरूले आफ्नो देवताको मकुण्डो, पोशाकदेखि आवश्यक सामानहरू खर्पनमा राखेर बोक्दै जानुपर्ने परम्परा अहिलेसम्म छ ।
काठमाडौं महानगरपालिका वडा नम्बर ८ का वडा अध्यक्ष आशामान संगतले वर्षमा एकपटक आउने नवदुर्गा भवानीको जात्रालाई सक्दो सहज र भव्य बनाउने पहल गरिरहेको बताएका छन् ।
