अनलाइन डबली
काठमाडौं । पूर्वप्रधानमन्त्री एवम् नेकपा (माओवादी केन्द्र) का अध्यक्ष प्रचण्डसँग गैरआवासीय नेपाली संघ (एनआरएनए) को प्रतिनिधि मण्डलबीच भेटवार्ता भएको छ ।
खुमलटारमा भएको भेटवार्तामा एनआरएनएको टोलीसँगको भेटमा प्रचण्डले विवाद समाधानको विगतमा आफूले पहल गरेको बताउँदै एनआरएनए तितरबितरको अवस्थामा पुग्नु चिन्ताको विषय भएको बताए ।
फुटेर नभई एकताबद्ध भएरमात्रै समृद्ध नेपाल निर्माणका लागि एनआरएनएको भूमिका प्रभावकारी हुने बताउँदै प्रचण्डले भने, ‘एनआरएनए प्रवासमा रहेका नेपालीहरूको सुखदुःखको साथी हो । तपाईँहरुको जुन उद्देश्य छ, एक नभईकन त्यो पूरा हुन गाह्रो छ । विगतमा पनि मैले एकताका लागि पहल गरेको थिएँ । अब पनि त्यसका लागि पहल गर्छु ।
२०८० असारमा प्रचण्डकै मध्यस्थतामा विभाजित अवस्थामा रहेका तत्कालिन दुई एनआरएनए (अध्यक्ष बद्री केसी, कुल आचार्य र रविना थापा पक्ष र विनोद कुँवर पक्ष) बीच एकता गर्ने सहमति जुटेको थियो ।
तर, त्यतिबेलाका तीन अध्यक्षमध्ये बद्री केसीले नचाहेसँगै एकता भाँडिएको थियो भने पछि विवाद थप बढेर विभिन्न समूहमा एनआरएनए रहेका छन् ।
सो अवसरमा एनआरएनए अभियन्ताहरूले एनआरएनएसँग सरोकार राख्ने विषयहरूबारे प्रचण्डको ध्यानाकर्षण गराएका थिए ।
पूर्वअध्यक्ष कुल आचार्यले गैरआवासीय नागरिकता कार्यान्वयनमा ढिलाइ भएकोप्रति प्रधानमन्त्रीको ध्यानाकर्षण गराए ।
उनले भने, ‘यहाँकै हातबाट लिएको गैरआवासीय नेपाली नागरिकता अहिलेसम्म प्रयोगमा आउन सकेको छैन, गैरआवासीय नागरिकता कार्यान्वयन हुन नसक्दा लाखौँ गैरआवासीय नेपाली चिन्तित छौँ । यसमा यहाँबाट सहजीकरणको अपेक्षा राखेको छु ।’
भेटमा सहभागी तत्कालिन अध्यक्ष विनोद कुँवरले आफूहरु विगतमा भएको सहमतिअनुसार एकजुट हुने बताउँदै त्यसमा सहजीकरणको आवश्यकता रहेको बताए ।
