अनलाइन डबली
नेपाल-भेनेजुएल मैत्री संघको घोषणा, राष्ट्रपति निकोलस मादुरोलाई बधाई
काठमाडौँ । नेकपा (माओवादी केन्द्र) का वरिष्ठ उपाध्यक्ष नारायणकाजी श्रेष्ठले आफूहरु कुनैपनि देशमाथिको हस्तक्षेप नचाहने बताएका छन् । श्रेष्ठले कसैले कसैको सार्वभौम सत्तामाथि हमला गर्न नहुने समेत बताए ।
शनिबार संवाद डबलीमा ‘नेपाल–भेनेभुएला मैत्री संघ’ को घोषणा कार्यक्रममा बोल्दै श्रेष्ठले भेनेजुएलामा कस्तो शासन बन्छ, त्यो अरुको चाँसो नभएर भेनेजुएलाका जनताले कस्तो सशासन चाहन्छन् भन्ने मुख्य कुरा भएको बताए । उनले कुनैपनि देशका जनताले चुनेको व्यक्ति वा सरकारमाथि विदेशी हस्तक्षे हुनु गलत रहेको बताए ।
आफ्नो राष्ट्र र राष्ट्रियताप्रतिको प्रतिवद्धताबारे अन्य देशहरुले भेनेजुएलाबाट सिक्न पर्ने समेत बताउँदै श्रेष्ठले पूर्वराष्ट्रपति चावेजविरुद्ध विगतमा देशी तथा विदेशी शक्तिको हस्तक्षेपलाई जनताले परास्त पारेको समेत बताए ।
पूर्वपरराष्ट्रमन्त्री समेत रहेका श्रेष्ठले भारत र चीनसँग मैत्रीपूर्ण, समानतामा आधारित मैत्रीपूर्ण सम्बन्ध कायम गर्न समान सम्बन्ध राख्नुपर्ने कुरामा जोड दिँदै विश्वका अरु देशसँग पनि नेपालले त्यही आधारमा सम्बन्ध राख्नुपर्नेमा जोड दिए । उनले संविधानका प्रावधानहरुलाई पकडेर समाजवादमा पुग्न सकिने दाबी समेत गरे ।
संघका अध्यक्ष नहेन्द्र खड्काले नेपाल र भेनेजुएलाबीचको सम्बन्धलाई जनस्तरमा पुर्याउन संघले भूमिका खेल्ने बताए । चौतर्फी घेराबन्दीबीच भेनेजुएलाका जनताले आफूले रोजेको शासन र नेतृत्वको रक्षाको लागि कसैसँग सम्झौता नगरेको बताउँदै खड्काले त्यसबाट अरुले पाठ सिक्नुपर्ने बताए ।
अध्यक्ष खड्काले साम्राज्यवादीहरूले नेपाललाइ क्रिडास्थल बनाउन खाेजेकाे समेत दाबी गरे ।
संघका महासचिव फणिन्द्रराज पन्तले संचालन गरेको कार्यक्रममा उपाध्यक्ष चिरागमानसिंह कुँवर, उपाध्यक्ष राविराम शर्मा, उपमहासचिव राजन कार्की, कोषाध्यक्ष लक्ष्मी अधिकारीले नेपाल र भेनेजुएलाबीचको सम्बन्ध जनस्तरसम्म पुर्याउने पर्नेमा जोड दिएका थिए ।
संघको अर्का उपाक्षमा मोहन गौतम, सदस्यमा कृष्ण गिरी, दामोदर पौडेल, हेमन्त भट्टराई रहेका छन् ।
संघले केही समयअघि भएकाे चुनावमा निर्वाचित भेनेजुएलाका राष्ट्रपति निकोलस मादुरोलाई बधाई दिँदै कार्यकालकाे सफलताकाे शुभकामना दिएकाे छ ।
