अनलाइन डबली
काठमाडौं । प्रधानमन्त्री केपी शर्मा ओलीले पदभार ग्रहण गरेपछि बसेको पहिलो मन्त्रिपरिषद् बैठकले निर्णयहरु २४ घण्टासम्म गोप्य राख्ने निर्णय गरेको छ ।
मन्त्रिपरिषद् बैठकपछि संचारमन्त्री पृथ्वीसुब्बा गुरुङले मन्त्रिपरिषद्का निर्णयहरु २४ घण्टासम्म गोप्य राखिने जानकारी दिए । उनले २४ घण्टाभित्र मन्त्रीले पनि निर्णयबारे जानकारी दिन नपाउने समेत बताए ।
निवर्तमान प्रधानमन्त्री प्रचण्डले मन्त्रिपरिषद्का निर्णयहरु गोप्य राख्ने प्रचलन हटाउँदै तुरुन्तै सार्वजनिक गराउँदै आएका थिए । तर, ओली सरकारले राजानका पालामा जस्तै मन्त्रिपरिषद्का निर्णयहरु गोप्य राख्ने प्रचलन सुरु गरेका छन् । राजाका पालामा ७२ घण्टासम्म मन्त्रिपरिषद्का निर्णयहरु गोप्य राखिन्थ्यो ।
राजाको पालामा मन्त्रिपरिषद्का निर्णयहरु बोकेर राजाकहाँ जानु पर्थ्यो र राजाले सहमति जनाएर लालमोहर लगाएका निर्णयहरु मात्रै सार्वजनिक गरिन्थ्यो ।
गणतन्त्र नेपालका प्रधानमन्त्रीले राजाको पालामा जस्तै मन्त्रिपरिषद्का निर्णयहरु गोप्य राख्ने फेरि निर्णय गरेका छन् । अब मन्त्रिपरिषद्ले के निर्णय गर्यो आम नागरिकले २४ घण्टापछि मात्रै जानकारी पाउने भएका छन् ।
सरकारको निर्णयको विरोध हुन सुरु भएको छ । सामाजिक संजाल प्रयोगकर्ताहरुले ओली सरकार सूचनाको हकप्रति अनुदार रहेको बताएका छन् । त्यस्तै, आम नागरिकलाई सही सूचना नदिई गोप्य राख्ने र आफू अनुकुल सूचना मात्रै सार्वजनिक गर्ने नियत देखिएको बताइएको छ ।
त्यसैगरी सरकारले गर्ने निर्णय गठबन्धनमा अविश्वास रहेको र निर्णयहरु राजालाई झैं गठबन्धन दलमा निर्णय अनुमोदन गराएर र अनुमोदन नगरेका निर्णय सार्वजनिक नगर्ने तयारी ओली सरकारको रहेको विश्लेषकहरु बताउँछन् ।
